Eksperti i Partisë Demokratike për reformën në drejtësi, Gazmend Bardhi i ftuar në emisionin ”Rreze Dielli” në Report TV, ka folur rreth qëndrimit të opozitës për ligjin e vettingun.
Bardhi është shprehur se pritet që komisioni i posaçëm parlamentar të mblidhet dhe aty do të bëhet i ditur edhe qëndrimi i Partisë Demokratike.
Sipas Bardhit ligji i ri do të shtrijë afatet e shqyrtimit të punës së gjyqtarëve nga 5 vite që ishin në 10 vite. Bardhi është shprehur se ekspertiza teknike tashmë ka përfunduar.
”Problemi më i madh i sistem gjyqësor në Shqipëri nuk është shkalla e ulët e kualifikimit, por korrupsioni.
Ligji është i hartuar nga një grup pune me ekspertë vendas dhe ndërkombëtarë por ai ka nevojë për plotësime sepse është një proces delikat.
Duhet parë dhe hetimi i DISK dhe ILDKPKI-së.
Ky ligj nuk vendos afate brenda të cilave duhet të veprojnë organet kompetente”, është shprehur Bardhi.
”Ky proces parashikon kontrolle të punës së gjyqtarin nga 1 janari i 2006-ës deri më sot. Ligji i tanishëm ka një afat 5-vjeçar.
Ligji parashikon transparencë, vendimmarrjet e komisionit do të jenë publike duke qartësuar arsyet e largimit nga detyra të personave të veçantë.
Opinioni publik duhet të njihet me çdo largim nga detyra të gjyqtarëve dhe prokurorëve që kanë shkelur ligjit.
Në seancë plenare ligjet do të shqyrtohen kur të jenë gati nga komisioni. Vetëm për vettingun PD ka një version final, ne akoma nuk jemi njohur me versionet e fundit të 6 ligjeve të tjera.
Në momentin që do kemi projektet, do miratohen 7 projektligjet. Nuk ka asnjë arsye për të nxituar ndaj nuk besoj se ligjet do mund të miratohen brenda 2 javëve”, ka thënë ai.
