Të jetosh në një shtëpi të vogël nuk do të thotë se duhet të heqësh dorë nga mobiliet apo dekorimi. Me disa zgjedhje të zgjuara, hapësira mund të duket shumë më e madhe dhe më e ajrosur.
Mobiliet me përmasa të përshtatshme, më pak bimë dekorative dhe dollapët e integruar janë vetëm disa nga zgjidhjet që mund të ndihmojnë. Interior designer-ja milaneze Angela Archinà, krijuese e stilit “Scandi Jungle Gold”, tregon se cilat elemente është më mirë të shmangen.
Në një ambient të vogël, një divan shumë i thellë, me mbështetëse të mëdha ose i vendosur në mënyrë që pengon kalimin, mund ta ngarkojë hapësirën.
2. Tavolina e madhe në qendër
Një tavolinë e madhe, e errët dhe me bazament të rëndë mund të zërë pikërisht hapësirën qendrore të dhomës dhe ta bëjë lëvizjen më të vështirë.
Në vend të saj, këshillohen modele më të lehta, transparente, të lëvizshme ose me këmbë të holla dhe sipërfaqe xhami.
3. Shumë mobilie të vogla
Komodina, raftet, mobiliet e vogla, mbajtëset e këpucëve apo karrocat dekorative mund të duken të padëmshme veçmas, por kur mblidhen në një hapësirë, krijojnë rrëmujë vizuale.
Një zgjidhje më e mirë mund të jetë një sistem i vetëm mobilimi që mbulon një mur dhe organizon gjithçka në mënyrë më të rregullt.
4. Dekorimet pa funksion
Një karrige që nuk përdoret, një llambë e tepërt, një pouf, tavolina të vogla apo mbajtëse revistash që qëndrojnë vetëm për dekor konsumojnë hapësirën pa sjellë ndonjë funksion real.
Rregulli është i thjeshtë: nëse një objekt nuk shërben për diçka, mund të jetë koha për ta larguar.
5. Tapete, perde, bimë dhe piktura të zgjedhura keq
Edhe elementet dekorative mund ta bëjnë një dhomë të duket më e vogël nëse nuk respektojnë përmasat e saj.
Një tapet shumë i vogël e ndan vizualisht dhomën në pjesë. Perdet që vendosen menjëherë mbi dritare ose përfundojnë në mes të murit mund ta bëjnë tavanin të duket më i ulët. Për këtë arsye, është më mirë të vendosen pranë tavanit dhe të zbresin deri në dysheme.
Edhe bimët duhet të përdoren me masë. Në vend të shumë vazove të vogla të shpërndara kudo, mund të zgjidhni një ose dy bimë më të mëdha në pozicione strategjike.
E njëjta vlen për pikturat: shumë tablo të vogla nëpër mure mund ta fragmentojnë hapësirën. Një vepër më e madhe ose një kompozim i menduar mirë mund të krijojë një pikë fokale dhe t’i japë karakter dhomës.
Po dollapët dhe bibliotekat?
Në një shtëpi të vogël, hapësirat e magazinimit janë të domosdoshme, por duhet të organizohen në mënyrë të zgjuar. Një dollap i integruar deri në tavan, i përshtatur me ngjyrën e mureve, zakonisht funksionon më mirë se disa mobilie të ulëta dhe të veçuara.
Edhe hapësirat që zakonisht mbeten të papërdorura mund të shndërrohen në vende ruajtjeje: niket, hapësira poshtë shkallëve, korridoret e gjera, pjesa mbi dyer apo zonat rreth shtyllave dhe qosheve.
Bibliotekat mund të jenë gjithashtu një zgjidhje e mirë, për sa kohë nuk mbushen deri në fund. Kombinimi i hapësirave të hapura me ato të mbyllura ndihmon që mobilia të duket më e lehtë.
Në përgjithësi, më mirë funksionojnë pak mobilie të zgjedhura mirë sesa shumë pjesë të vogla. Shumë elemente krijojnë ndërprerje vizuale dhe e bëjnë ambientin të duket i rrëmujshëm. Një mobilie kryesore me përmasa të përshtatshme, e shoqëruar me elemente më të lehta, mund ta bëjë hapësirën të duket më e madhe dhe më harmonike.
