Ish-kreu i Kushtetueses në Kosovë Enver Hasani, sqaron për Klan News anën juridike të zgjedhjes së presidentes Justina Shiroka-Pula.
Në një prononcim për gazetarin Besard Jacaj, Hasani theksoi se zgjedhja e kryetares së shtetit është ligjore, pavarësisht tejkalimit të afatit.
Sipas tij, fakti që procesi i numërimit dhe shpalljes së rezultatit ka zgjatur disa minuta përtej afatit nuk përbën çështje kushtetuese. Ai argumenton se Kuvendi mbetet fuqiplotë dhe se për shpërndarjen e tij nevojitet një dekret formal.
Hasani nënvizon se në këtë rast nuk ka shkelje kushtetuese dhe se tejkalimi i afatit nuk e cenon vlefshmërinë e zgjedhjes së presidentes.
“Procesi i numërimit dhe shpalljes së rezultatit mund të zgjasë edhe disa minuta përtej afatit, pa përbërë kjo një çështje kushtetuese. Kuvendi mbetet fuqiplotë, pasi për shpërndarjen e tij kërkohet një dekret formal. Nuk ka asnjë të metë kushtetuese në këtë drejtim”.
Justina Shiroka Pula është zgjedhur presidente e Kosovës më 7 tetor, pas një marrëveshjeje në çastet e fundit mes Lëvizjes Vetëvendosje në pushtet dhe Partisë Demokratike të Kosovës në opozitë, pak para përfundimit të afatit kushtetues për zgjedhjen e presidentit të ri të vendit.
Ajo u zgjodh qysh në raundin e parë të votimit, me 81 vota për, minimumi i kërkuar në këtë raund.
