Christa Pike, e dënuara me vdekje në Tenesi, i ka mbijetuar përpjekjes së dështuar të autoriteteve për ta ekzekutuar dhe tashmë është e vetëdijshme dhe në gjendje të flasë, ndërsa vijon të marrë trajtim në spital.
Avokatët e 50-vjeçares thanë se ajo është zgjuar dhe po komunikon me stafin mjekësor, megjithëse gjendja e saj mbetet e rëndë dhe prognoza ende e paqartë.
Pike i mbijetoi dy dozave të pentobarbitalit, një medikament qetësues i përdorur në procedurën e ekzekutimit, më 30 shtator. Ajo ishte planifikuar të bëhej gruaja e parë e ekzekutuar në Tenesi pas më shumë se 200 vitesh.
“Pavarësisht të gjitha gjasave, Christa Pike është e vetëdijshme, flet dhe vazhdon të marrë kujdes mjekësor intensiv. Pavarësisht dëmtimeve të rënda që ka pësuar në krahë, ajo ende mbahet e prangosur dhe e lidhur në shtrat. Shërimi i saj është i pashembullt në aspektin mjekësor. Prognoza mbetet e paqartë, por së paku presim një rikuperim të gjatë”, deklaruan avokatët e saj.
Ata falënderuan ekipet e emergjencës dhe mjekët që po trajtojnë Pike, duke theksuar se ajo ka marrë kujdes të jashtëzakonshëm dhe është trajtuar me dinjitet.
Avokatët thanë gjithashtu se Pike është personi i vetëm i njohur që ka mbijetuar një përpjekjeje të plotë për ekzekutim në SHBA. Ata i kanë kërkuar guvernatorit të Tenesit që dënimin me vdekje t’ia ndryshojë në burgim të përjetshëm, pa mundësi lirimi me kusht.
Kjo ishte deklarata e parë që konfirmoi përmirësimin e gjendjes së Pike që prej momentit kur një ambulancë e transportoi nga burgu në Nashville, më 30 shtator.
Dëshmitarët e ekzekutimit të dështuar kanë treguar se pas injektimit të parë, Pike kaloi rreth një orë duke u mbytur dhe duke luftuar për të marrë frymë. Pas dështimit të dozës së dytë, ajo u dërgua në spital, ku u vendos në ventilim mekanik dhe fillimisht u raportua në gjendje kritike.
Një prej avokatëve të saj, Randy Spivey, e cilësoi procedurën si “mizore dhe torturuese”. Ai tha se kishte numëruar shtatë gjilpëra në krahun e majtë të Pike, njëra prej të cilave dukej se ishte përkulur kur u hoq.
Avokatët kishin paralajmëruar para ekzekutimit se autoritetet mund të kishin vështirësi në gjetjen e venave të Pike dhe se përpjekjet për vendosjen e linjave intravenoze mund t’i shkaktonin vuajtje. Megjithatë, autoritetet e shtetit vijuan me procedurën dhe Gjykata Supreme e SHBA-së lejoi që ekzekutimi të zhvillohej.
Ngjarja shkaktoi reagime të forta kundër dënimit me vdekje dhe kritika nga aktorë të ndryshëm politikë. Pas incidentit dha dorëheqjen edhe drejtuesi i burgjeve në Tenesi, Frank Strada. Avokatët e Pike kanë deklaruar se kjo ishte përpjekja e pestë e dështuar për ekzekutim nën drejtimin e tij në dy shtete.
Pike u dënua me vdekje për vrasjen e 19-vjeçares Colleen Slemmer në vitin 1995. Në atë kohë, Pike ishte 18 vjeçe, ndërsa i dashuri i saj, i cili mori pjesë në krim, ishte 17 vjeç.
Sipas prokurorisë, Pike dyshonte se Slemmer po përpiqej t’i merrte të dashurin, Tadaryl Shipp. Të dy e joshën 19-vjeçaren në një zonë të pyllëzuar pranë Universitetit të Tenesit, ku Pike e sulmoi me një prerëse kutish dhe më pas e goditi në kokë me një gur. Shipp i gdhendi një pentagram në gjoks viktimës.
Shipp u shpall fajtor për vrasje të shkallës së parë në vitin 1997 dhe u dënua me burgim të përjetshëm, me mundësi lirimi me kusht.
Pike nuk e ka mohuar asnjëherë përfshirjen në vrasje. Më vonë ajo u diagnostikua me çrregullim bipolar dhe stres post-traumatik. Në kërkesën për falje, ajo ka shprehur pendesë për krimin dhe pasojat që pati tek familja e viktimës dhe të tjerët.
Gjatë fëmijërisë, Pike kishte përjetuar abuzime të shumta, përfshirë përdhunime dhe dhunë fizike nga persona të ndryshëm. Ajo kaloi gjithashtu rreth 30 vite në izolim, ndërsa qëndronte në burgun e të dënuarve me vdekje.
Pas ekzekutimit të dështuar, Helen Prejean, murgeshë katolike dhe një prej zërave më të njohur në SHBA kundër dënimit me vdekje, e cilësoi ngjarjen si “thelbin e mizorisë”, duke argumentuar se vuajtja psikologjike e një personi që pret datën e vdekjes dhe më pas i mbijeton një përpjekjeje për ta vrarë është jashtëzakonisht e rëndë.
