“E rëndësishme është që të bëjmë një buxhet sa më të mirë… dhe tani, t’më falni, do takoj kushërirën time se kam kaq kohë pa e takuar”.
Ka qenë kjo mënyra me të cilën është përgjigjur Kryetari i Parlamentit Ilir Meta, pas pyetjes së gazetarëve për “impulset e reja” në qeveri. Meta ka shfrytëzuar koincidencën e momentit, teksa gjatë pyetjes për “impulset e reja” në afri të zonës ku kreu i LSI ishte ndaluar nga gazetarët, kalon një kushërirë e tij
Kreu i kuvendit pati një takim me kryetarin e PDIU Shpëtim Idrizi fill pas takimit me Kryeministrin Edi Rama dhe zyrtarë të lartë të qeverisë në ambientet e vilës qeveritare përballë kryesisë së kuvendit.
Në lidhje prononcimin e ministrit Ahmetaj, i cili ishte dhe i vetmi që foli pas takimit 90 minutësh mes krerëve të PS e LSI, Meta theksoi se çështja e buxhetit të shtetit është ende në diskutim dhe se do të dëgjohen grupet e interesit. Ndërkohë që pozicioni i Ministrit të PS, Ahmetaj ishte se pas diskutimeve për buxhetin dhe ekonominë për vitin 2016 do të parashikohet ulja e taksave, sic theksoi Ahmetaj, sidomos për sektorin bujqësor.
“Unë mendoj që këto janë çështje të cilat vijojnë të diskutohen. Edhe vetë buxheti ende nuk është paraqitur dhe pasi të paraqitet do të fillojnë debatet do të dëgjohen grupet e interesit. Ne kemi dëgjuar një ekspoze të qeverisë dhe jemi ende në diskutime…Patjetër që ne shqetësimet do ti dëgjojmë, do të përpiqemi ti reflektojmë maksimalisht brenda hapësirave dhe mundësive makroekonomike pasi është mjaft e rëndësishme që klima ndaj biznesit të përmirësohet”- tha Meta.
