Zyrtari serb i listës “Srpska” që fyeu kosovarët nuk do paraqitet në prokurori më 22 Maj. Aleksander Jabllanoviç, ish ministri për Kthim dhe Komunitete në Qeverinë e Kosovës, ka thënë se nuk do të paraqitet në prokurori, pas ngritjes së padisë nga Prokuroria Themelore në Gjakovë.
“Ne, që nuk nuk jemi fajtorë për asgjë nuk kemi asnjë arsye ta dëshmojmë pafajësinë tonë, e posaçërisht para prokurorisë në Gjakovë”, ka thënë ai për Radio Kontakt Plus, transmeton Klan Kosova.
Jabllanoviq i ka quajtur egërsira nënat e gjakovarëve të zhdukur. Kjo ndodhi më 6 janar, me rastin e Krishtlindjeve ortodokse, kur familjarë të të pagjeturve nga ky qytet i Kosovës protestuan për vizitën e një grupi serbësh këtu.
Jabllanoviç ka thënë se ngritja e një padie ndaj tij, është presion që u bëhet liderëve serbë në përgjithësi.
“Në radhë të parë, ky është një presion që u bëhet përfaqësuesve politikë të serbëve për t’i frikësuar dhe disiplinuar ata në mënyrë që të heshtin kur ndodh dhunë ndaj popullit serb në Kosovë e Metohi”, ka deklaruar ai.
