PDIU mbështet variantin e kompromisit të ofruar nga zyrtarja e lartë amerikane Nuland, lidhur me Reformën në Drejtësi. Këtë qëndrim kryetari i PDIU-së, Shpëtim Idrizi, e ka bërë të ditur gjatë një takimi të zhvilluar sot pasdite me me ambasadorin e SHBA, Donald Lu dhe ambasadoren e BE, Romana Vllahutin. Gjatë këtij takimi Idrizi u informua për zhvillimet e fundit për Reformën në Drejtësi dhe propozimim e zëvendës sekretares së Shtetit, Viktoria Nuland, si një propozim që afron palët. Kreu i PDIU-së falenderoi ambasadorët për ndihmën shumë të çmuar për Reformën në Drejtësi dhe angazhimin e tyre për “miratimin e kësaj reforme ekstremisht të rëndësishme për shëndoshjen e institucioneve e të shtetit ligjor dhe demokracisë në Shqipëri”. Ai theksoi faktin që 90% e shqiptarëve, por dhe të gjitha forcat politike janë shprehur për rëndësinë dhe domosdoshmërinë e kësaj reforme. Shpëtim Idrizi vuri theksin në qëndrimin e PDIU-së në favor të kësaj
reforme dhe mbështetjen për variantin e ri të kompromisit të dhënë së fundi nga partnerët ndërkombëtarë. PDIU i bën thirrje të gjitha partive parlamentare dhe deputetëve të Kuvendit ta miratojnë dhe këtë nen të fundit duke e konsideruar një mundësi të qartë kompromisi propozimin e zëvendës sekretares së Shtetit për rekomandimin 88. PDIU insiston që dhe pas miratimit të kësaj reforme të shkohet drejt referendumit si shprehje direkte e demokracisë. Idrizi shprehu pozicionin e PDIU-së që në rast mos gjetjes së kompromisit për rekomandimi 88 të shkohet në referendum për këtë nen, duke ju drejtuar sovranit të shprehet për këtë nen që po mban peng një reformë kaq të rëndësishme. Kreu i PDIU-së, i shprehu ambasadorëve qëndrimin e qartë të PDIU-së që neni 18, i cili i hap udhë martesave homoseksuale nuk është pjesë e reformës në drejtësi, por megjithë qëndrimin kundër, ka nevojë për një debat më të gjerë publik.
Me. Ar
