Një ngjarje tronditëse ka ndodhur në Trescore Balneario, në provincën e Bergamos në Itali, ku një mësuese 57-vjeçare është plagosur rëndë me thikë nga një nxënës 13-vjeçar. Ngjarja ka ndodhur paraditen e sotme jashtë institutit shkollor në rrugën Damiano Chiesa.
Sipas informacioneve të para, adoleshenti, i cili ndjek klasën e tretë të shkollës së mesme të ulët, e ka sulmuar mësuesen me thikë, duke e lënë të plagosur rëndë. Menjëherë pas incidentit, ai është neutralizuar dhe ndaluar nga autoritetet. Mësuesja është transportuar me helikopter drejt spitalit në Bergamo, ku ndodhet në gjendje jo të mirë, por jashtë rrezikut për jetën.
Detaje shqetësuese kanë dalë në dritë lidhur me autorin e mitur. Ai kishte veshur pantallona kamuflazhi dhe një bluzë me mbishkrimin “Vendetta” (“Hakmarrje”). Në çantën e tij u gjet gjithashtu një armë lodër, çka ka shtuar edhe më shumë shqetësimin për natyrën e sulmit.
Ngjarja ka shkaktuar reagime të forta nga autoritetet dhe drejtuesit e arsimit. Ministri i Arsimit e cilësoi episodin si jashtëzakonisht të rëndë dhe tronditës, duke shprehur solidaritet me mësuesen, familjen e saj dhe komunitetin shkollor. Ai theksoi nevojën urgjente për miratimin e masave më të ashpra kundër kriminalitetit të të rinjve dhe përdorimit të armëve të rrezikshme, si dhe për forcimin e edukimit dhe mbështetjes psikologjike në shkolla.
Edhe përfaqësues të sistemit arsimor kanë ngritur alarmin për rritjen e dhunës mes të rinjve. Sipas tyre, raste të tilla po bëhen gjithnjë e më të shpeshta dhe tregojnë një krizë të thellë edukative. Ata shtrojnë pyetje të forta mbi rolin e familjes dhe kontrollin ndaj fëmijëve, duke theksuar se është e papranueshme që një 13-vjeçar të dalë nga shtëpia i armatosur.
