Procesi i Vettingut shumë shpejt pritet që të prekë emrat e parë të sistemit të drejtësisë. Puna do të nisë me tre emrat më të rëndësishëm: Kryeprokurorin Adriatik Llalla, kreun e Gjykatës së Lartë, Xhezair Zaganjori dhe me kreun e Gjykatës Kushtetuese, Bashkim Dedja. Ligji ka një përcaktim që prioritet duhet t’u jepet krerëve të institucioneve të Drejtësisë.
Më pas do vijohet me kreun e Gjykatës së Krimeve të Rënda, Sandër Simoni, kreun e Prokurorisë së Tiranës, Petrit Fusha dhe me krerët e gjykatave dhe prokurorive të rretheve, përfshirë dhe Gjykatën Administrative. Sipas përcaktimeve, procesi pritet të nisë më 1 Nëntor të këtij viti.
Mësohet se pas verifikimit të drejtuesve të lartë në sistemin e drejtësisë, puna do të vijojë me gjyqtarët dhe prokurorët e thjeshtë, ku fokusi kryesor është Tirana.
Nga 1 nentori pritet që gjithë pjestaret e sistemit të drejtësisë t’i nënshtrohen një kontrolli rigoroz, nga kontrolli i llogarive bankare, tek të ardhurat e çdo familjari e deri te pasuritë e paluajtshme.
Në lëvizje pritet të vihet edhe drejtoria e Pastrimit të Parave, e cila do zhvillojë kontrolle brenda dhe jashtë vendit për çdo transfertë bankare të bërë nga njerëzit e drejtësisë.
Gjatë ditës së sotme Bashkim Dedja, Sandër Simoni dhe Xhezair Zaganjori u kanë bërë thirrje kolegëve të korruptuar që të largohen me dëshirë përpasa se Vettingu t’i ‘flakë’ jashtë sistemi dhe të ketë pasoja të rënda. /JavaNews
