Tre persona janë arrestuar nga policia pas vdekjes së një punëtori dhe plagosjes së një tjetri nga shpërthimi me eksploziv paraditen e djeshme në guroren e Kurçajt në Nikël. Si pasojë e shpërthimit me tritol në gurore humbi jetën Asllan Jaupaj 55 vjeç dhe mbeti i plagosur Gani Demushaj 55 vjeç.
Ngjarja e rëndë ndodhi dje paradite rreth orës 11:00, por policia reagoi duke e bërë publike vetëm pasi kishte dalë në media në mbrëmje. Emrat e tre të arrestuarve ende nuk jepen nga policia, ndërsa dje u shoqëruan përfaqësuesi i kësaj guroreje Neritan Jaupi dhe një punonjës tjetër që ishte i pranishëm gjatë momentit të shpërthimit.
Sipas mediave informative, shpërthimi gjatë montimit të minave elektrike është bërë pa marrë një autorizim në autoritetet përkatëse, pasi një gjë e tillë bëhet kundrejt një pagese në bankë. /e.s/
