Një audicion për edicionin e ardhshëm të festivalit madhështor të muzikës operistike në Salzburg, “Festspiele”, do të bëhej shkak që sopranoja e njohur kosovare, Elbenita Kajtazi, të shkonte në Austri. Përgjigjen e kishte marrë menjëherë. Verën e vitit që vjen ajo do të jetë pjesë e festivalit prestigjioz. Por këtu s’përfundon rrugëtimi i saj. Së fundi, solistja e “Deutche Oper” është nisur drejt një tjetër destinacioni. Ia kishte mësyrë një tjetër kontinenti – Azisë, saktësisht qytetit të Daegut në Korenë e Jugut.
Kajtazi bashkë me orkestrën simfonike të këtij qyteti si dhe me këngëtarë nga Opera e Shangait, të shtunën do të ngjiten në sallën kryesore të shtëpisë së operës së Daegut. Kjo pjesëmarrje dhe sukses që ka arritur, Kajtazin e ka bërë shumë të lumtur.
