Ministria e Arsimit hedh poshtë pretendimet e PD-së se nuk kanë marrë asnjë vendim pas skandalit në shkollën e muzikës në Fier, ky dy mësues u kërkonin favore seksuale nxënëseve.
Ata bëjnë me dije se janë marrë masat ku të gjithë personat përgjegjës janë shkarkuar apo janë duke u ndjekur edhe penalisht, ndonëse është janë ende të dyshuar. Një informacion i tillë, thekson ministria, nuk është trumbetuar në media për të mbrojtur personat e dëmtuar, në këtë rast nxënëset, por është tregues i qartë sipas tyre për seriozitetin që kanë treguar lidhur me këtë ngjarje, ndryshe nga sa PD-ja pretendon.
“Të gjithë personat e dyshuar si të përfshirë për abuzime ndaj nxënësve në rastin e një shkolle në Fier janë shkarkuar apo janë duke u ndjekur edhe penalisht.
Drejtoria e Përgjithshme e Arsimit Parauniversitar ka marrë masa të tjera të menjëhershme si ndryshimin i pjesëtarëve kryesorë të stafit të institucionit arsimor, dhënien e ndihmës psiko-sociale, ndërsa ndjekim nga afër çdo zhvillim në lidhje me hetimet e organeve kompetente. Parandalimi është kyç, prandaj rregullorja e re e arsimit parauniversitar parashikon dënimet më të larta për ata që nuk punojnë në të mirën e nxënësve, abuzojnë apo përdorin çfarëdo lloj forme të dhunës në shkollë. Masat janë marrë edhe pse jemi ende në gjendjen e dyshimeve dhe jo përfundimeve finale, që tregon seriozitetin me të cilin MASR dhe institucionet e varësisë marrin në raste të tilla.
Natyrisht, masat e ndërmarra nuk janë trumbetuar në media për shkak se qëllimi ynë nuk është të bëjmë dëm duke ekspozuar ata që ndihen të dëmtuar. Gjë, të cilën po e bëjnë ata që nuk po rreshtin së shfrytëzuari në mënyrë makabre këtë rast për tërheqje vijueshmërie mediatike apo qërim hesapesh politike. Ky është abuzim në vete dhe si MASR kemi detyrimin të luftojmë edhe këtë formë të abuzimit në mbrojtje të nxënësve tanë”, thuhet në njoftimin e Ministrisë. /e.s/
