Drejtori i Policisë së Lezhës është pezulluar nga detyra. Vetëm dy muaj pas emërimit në atë detyrë, Dritan Lena është pezulluar me urdhër të kreut të Policisë, Haki Çako.
Burime policore zyrtare kanë thënë dje se lëvizja e tij ka ardhur për shkak të dështimit në arritjen e objektivave në luftën kundër krimit. Burimet e njëjta kanë shtuar se në vend të Lenës, në krye të Drejtorisë së Policisë së Lezhës është caktuar Erzen Cera.
“Drejtori i Policisë Lezhë është pezulluar nga detyra tri ditë më parë për shkelje të procedurave standarde në punë”, ka thënë dje zyra e shtypit e policisë.
Ndërkohë, ditën e djeshme burime jozyrtare të policisë kanë thënë se largimi nga detyra e kreut të Policisë së Lezhës mund të ketë lidhje me një ngjarje të ndodhur në zonën e mbuluar nga Lena, kur ishte me detyrë në Komisariatin nr.4.
Më konkretisht ka dyshime se pezullimi nga detyra i kreut të Policisë së Lezhës, Dritan Lena, ka ndodhur për hashashin e asgjësuar në Priskë të Dajtit. Vendimi për pezullimin e kreut të Policisë së Lezhës është marrë më 1 shtator 2016 dhe për këtë vendim nuk ka pasur asnjë njoftim zyrtar.
Disa burime jozyrtare kanë thënë se pezullimi ka të bëjë me menaxhim të dobët të zonës që Dritan Lena mbulonte në kohën kur kryente detyrën e shefit të Krimeve në Komisariatin nr.4. Këtë detyrë, ishkreu i Policisë së Lezhës e ka mbajtur deri më 21 korrik të këtij viti. Në këtë datë, pasi mori gradën e drejtuesit, Drina Lena u emërua në krye të Drejtorisë Qarkut Lezhë.
Panorama/d.i.
