Me një letër drejtuar kryetarit të Komisionit paralmentar të Mbrojtjes dhe Çështjeve të Brendshme, 13 deputetë të partisë opozitare “Demokracia e Re” në Greqi kanë kërkuar një seancë me dyer të mbyllura të këtij komisioni, në mënyrë që të diskutohet ecuria e marrëdhënieve greko-shqiptare, e sidomos negociatat në zhvillim me Tiranën për paketën e problemeve, midis të cilave të drejtat e minoritetit kombëtar grek dhe përcaktimi i Zonës Ekonomike Ekskluzive.
Dy javë më parë, për të njëjtën çështje është thirrur në interpelancë nga opozita konservatore edhe ministri i Jashtëm.
Siç theksohet në letër, “çështja është veçanërisht e ngutshme për shkak se, sipas informacioneve dhe deklaratat e dy ministrave të Jashtëm, Kotzias dhe Bushati, negociatat kanë arritur në një fazë kritike dhe marrëveshja për përcaktimin e kufijve detarë thuajse ka përfunduar”.
Opozita në Parlament kritikon ashpër kreun e diplomacisë greke, për shkak se ai nuk ka dhënë informacione dhe shpjegime në lidhje me përmbajtjen e bisedimeve shqiptaro-greke, si dhe tërësinë e çështjeve që përfshihen, duke e lënë të gjithë këtë proces – sipas saj, – në errësirë të plotë.
Konservatorët këmbëngulin se, edhe nga bisedimet me ish-Republikën jugosllave të Maqedonisë, qeveria “Tsipras” solli një marrëveshje të dëmshme për interesat e Greqisë, ndaj duhet paraprirë situata që të mos ketë një marrëveshje të dytë të tillë edhe me Shqipërinë.
Midis deputetëve që kanë nënshkruar letrën është edhe nënkryetari i “Demokracisë së Re”, Adonis Georgiadis, si dhe ish-kryetari i kësaj partie dhe ministër i Mbrojtjes në qeverinë e fundit të konservatorëve, Evangelos Meimarakis.
a.ç
