Gjeneral brigade Manushaqe Shehu emërohet zëvendësshefe e Shtabit të Përgjithshëm, duke u bërë kështu gruaja e parë që shërben në një detyrë kaq të lartë në Forcat e Armatosura Shqiptare.
Zëvendësshefja e Shtabit të Përgjithshëm të FA gjeneral brigade Shehu më parë shërbente në detyrën e komandantit të Komandës së Doktrinës dhe Stërvitjes dhe zëvendëson në detyrë gjeneral brigade Dedë Prengën, i cili emërohet zëvendëskomandant i Forcës Tokësore.
Vendin e lënë bosh nga gjeneral brigade Shehu në krye të Komandës së Doktrinës dhe Stërvitjes, e zë gjeneral brigade Bajram Begaj, i cili është mjeku i parë ushtarak shqiptar që mban gradën gjeneral brigade.
Ministrja e Mbrojtjes Olta Xhaçka në ceremoninë e prezantimit të drejtuesve të rinj vlerësoi kontributin dhe përvojën e tre ushtarakëve të lartë dhe shprehu bindjen se tre gjeneralët do të përmbushin më së miri pritshmëritë në detyrat e reja.
