Ka nisur prej orës 13:00 mbledhja e Komisionit Qendror të Zgjedhjeve për të vendosur për fatin e mandatit të deputetëve Gledion Rehovica dhe Aqif Rakipi. KQZ në mbledhjen e dy ditëve më parë vendosi që ta shtynte për ditën e sotme vendimin, duke i kërkuar prokurorisë së Përgjithshme më shumë informacion për kërkesën për heqjen e mandatit të Rehovicës dhe Rakipit.
Deputeti Aqif Rakipi përmes avokatit të tij mbrojtës kërkoi pezullimin e procedurës administrative në KQZ për ndërprerjen e mandatit deri në një vendim nga Gjykata Administrative e Apelit.
“Në këtë gjykatë deputeti Rakipi ka kërkuar shfuqizimin e të vetmes bazë ligjore për të cilën kërkohet ndërprerja e mandatit. Nëse shfuqizohet ky veprim, atëherë lidhet drejtëpërdrejtë me kërkesën e prokurorisë për heqjen e mandatit” deklaroi avokati mbrojtjës Theodhori Sollaku.
Por kjo kërkesë e hedhur në votim nga anëtarët e KQZ u hodh poshtë.
Mësohet se rreth orës 12:00 të ditës së sotme, prokuroria ka sjellë informacionet shtesë. Për deputetin e PDIU-së, Rakipi Interpol Roma thotë se ai është raportuar për vjedhje me emrin Skënder Ejylbegaj. Vjedhja në fjalë ka ndodhur në 03.11.1998, kohë kur deputeti ka deklaruar në formularin e dekriminalizimit se ka qenë emigrant në Itali.
Deputeti i LSI-së, Gledion Rehovica sipas Interpol Romës, është i raportuar për vjedhje dyqani me emrin Kusta Mina në 27.02.1999, kohë kur vetë deputeti ka deklaruar se jetonte në Itali si student. Prokuroria kërkon heqjen e mandateve, por pritet vendimi KQZ. Sot do të vendoset edhe për kryebashkiakun e Pogradecit Eduart Kapri, i cili është dëbuar nga Italia në 1998.
Zhvillimet e fundit nga mbledhja e KQZ
14:05 Klement Zguri: Nuk është serioze që t’i drejtohemi sërish prokurorisë për informacion. Sot është afati i fundit ligjor…
14:00 Anëtari i KQZ, Bledar Skënderi: Duam informacion nga Gjermani pse u dëbua?
13:55 Përfaqësuesi i PD, Ivi Kaso: Vendimin duhet ta marrë KQZ, institucionet e tjera të japin informacionet, por jo t’u bëhet gjyqi. KQZ nuk duhet t’i bëjë gjyqin prokurorisë.
13:55 Avokati i Kaprit: Ka vetëm një dëbim nga Italia dhe jo nga Gjermania
Rasti Kapri, Denar Biba: Nëse është dëbuar për cështje jo emigracioni ne duhet të dimë. Prokuroria shprehet vetëm për rastin e dëbimit nga Italia dhe jo nga Gjermania. Ne ia kemi lënë edhe turpin edhe nderin prokurorisë për rastin. Ne duam shkakun e debimit
13:50 Bledar Skënderi: T’ia rikthejmë prokurorisë kërkesën për Kaprin për një përgjigje se përse është dëbuar nga Gjermania Kapri?
13:45 Çështja e Kaprit, Avokati: Nuk preket nga dekriminalizimi
Gerald Blacëri: Eduart Kapri nuk është i pranishëm, pasi ndodhet në mbledhjen e këshillit bashkiak ku miratohet buxheti. Nuk kemi kundërshtim mbi vendimin e prokurorisë. Dëbimi për arsye emigracioni nuk përbën shkak për heqjen e mandatit. Kapri rezulton i padënuar në Itali dhe KQZ duhet ta cmojë vendimin e prokurorisë të drejtë.
13:30 Avokati: Rehovica nuk është i inkriminuar që të flaket jashtë
Ardian Visha: Deputeti nuk ka bërë asgjë. Ajo që pretendohet si raportim i përcjellë nga Interpol është thjeshtë një marrje gjurmësh. Ai akuzohet për vjedhjen e një xhupi në supermarket, por nuk ka qenë kurrë në hetim. Nuk ka asnjë akt që të mund të provojë marrje në hetim Rehovicës, por asnjë akt e statusit të personit në hetim apo dënuar. Barra e provës mbetet e prokurorisë.
Edhe akuza për emrin e rremë është e paqenë, pasi ky individ i ka dhënë shenjat e gishtave. Kërkoni nga Italia një certifikatë edhe për Rehovicën edhe për Mina Kustën që nuk ka pasur kurrë hetim apo procedim. Rehovica nuk është i inkriminuar që të flaket jashtë Kuvendit. E papranueshme! Nuk mundet që të pranohet kjo praktikë pa fakte dhe e paprovuar. Nuk mund t’i ndërpritet mandati pa asnjë provë, por me një aludim.
13:25 Sollaku: Rakipi e përdori emrin tjetër pa qëllim, s’duhet të hiqet mandati
“Deputeti nuk vërtetohet se preket nga ligji i dekriminalizimit. Rakipi nuk ka bërë fshehje të qëllimshme. Përdorimi i identitetit tjetër ka qenë i paqëllimshëm, por përdorimi i identiteteve të tjera nuk është shkak për ndërprerjen e mandatit. Rakipi nuk është dënuar as jashtë vendit dhe as në Shqipëri. Në situata të ngjashme KQZ nuk ka hequr mandatin, si për ish-komunarin e Hasit.
Nuk kemi asnjë provë, prokuroria ka abuzuar duke përdorur informacionet policore. Të ndëshkosh një deputet vetëm duke u bazuar te një informacion policor… Pse nuk solli provat që pretendon. Nuk ka sekret të paraqitësh në një proces faktet. Përbën sekret të pretendosh që Rakipi ka mbajtur vende të vjedhura? Kjo përbën një precedent” tha avokati i Aqif Rakipit.
Ora 13:18 Sollaku: Procesi i paragjykuar. Rakipi nuk ka shkelur ligjin për dekriminalizimin. Nuk ka asnjë provë ndaj Rakipit, ai as nuk është dënuar dhe as nuk është dëbuar nga asnjë shtet
Vera Shtjefni: Ligji i dekriminalizimit përcakton një afat që duhet të bëhet shqyrtimi i rezultateve. Afati është 10 ditë. Gjykata do të japë vlerësimin për atë që ju thoni, por KQZ ka bazë ligjin për dekriminalizimin dhe jemi të detyruar të shqyrtojmë cështjen brenda 10 ditëve.
Dhori Sollaku: E prisja. Më vjen keq që ky proces është nisur paragjykues për vendimmarrjen tuaj
Klement Zguri: Hedhim në votim kërkesën. 6 vota kundër, rrëzohet
Avokati i Rakipit, Dhori Sollaku: Kërkojmë pezullimin e kërkesës. Rakipi ka kërkuar shfuqizimin e bazës ligjore. Paraqesim kërkesën për pezullimin e procedurës.
13:00 Dy deputetët nuk janë të pranishëm në mbledhjen e KQZ
vijon….
a.ç
