Një burrë në jug të Francës ka dalë para gjykatës nën akuzën se ka droguar dhe abuzuar dhjetëra gra seksualisht, si dhe ka filmuar disa prej rasteve.
Koreografi dhe hipnoterapisti Cyril Zattara akuzohet për përdhunimin e 14 grave në harkun kohor të një dekade dhe ka filmuar fshehurazi rreth 20 të tjera.
Gjyqi po zhvillohet me dyer të mbyllura në Aix-en-Provence sipas kërkesës së njërës prej viktimave dhe do të zgjasë rreth dy javë. Të tjerat kanë kërkuar që ngjarja të trajtohet haptazi sepse duan që zërat e tyre të dëgjohen nga sa më shumë njerëz të jetë e mundur.
Sipas hetimit të policisë, Zattara hidhte pilula gjumi në pijet e grave para se t’i sulmonte seksualisht. Shpesh ai shënjestronte gra që i kishte mikesha apo një lidhje intime.
Në kompjuterin e tij, hetuesit gjetën foto e video ku viktimat ishin në gjendje letargjie gjatë akteve seksuale.
Një paditëse, e cila e akuzoi në vitin 2019 pasi mori pjesë në një nga seancat e hipnozës, tha se ajo piu verën që ai i kishte ofruar dhe më pas u zgjua duke kujtuar fragmente sesi ishte përdhunuar nga Zattara dhe kishte vjellë.
Në thonjtë dhe të brendshmet e saj u gjet ADN-ja e tij, kurse analizat toksikologjike konstatuan praninë e ilaçeve të fuqishme të gjumit në organizëm.
Rasti i Zattara risjell në vëmendje çështjen e famshme të Dominique Pelicot, i cili u dënua me 20 vite burg sepse drogoi e përdhunoi bashkëshorten, Gisèle, e më pas lejoi të panjohur që të kryenin marrëdhënie seksuale me të përgjatë një dekade.
