Ministrja e Punëve të Brendshme, Albana Koçiu, ka deklaruar nga Shkodra se situata e krijuar nga reshjet e dendura gjatë orëve të fundit është aktualisht nën kontroll, ndërsa të gjitha institucionet përgjegjëse janë në gatishmëri të plotë.
Pas takimit me Shtabin e Emergjencave në Bashkinë e Shkodrës, Koçiu theksoi se monitorimi po bëhet në shkallë kombëtare. “Jemi duke monitoruar të gjithë situatën e reshjeve në vend, jo vetëm në qarkun e Shkodrës, por edhe në Durrës, Kukës, Fier dhe Vlorë, për të shmangur çdo lloj situate problematike që vjen nga reshjet”, u shpreh ajo.
Ministrja bëri me dije se reshjet e dendura kanë përfshirë vendin gjatë 24 orëve të fundit dhe pritet të vijojnë edhe gjatë ditës së nesërme. “Vendi është prekur nga një situatë reshjesh të dendura gjatë këtyre 24 orëve dhe ndërkohë pritet edhe nesër të kemi po të njëjtën situatë”, tha Koçiu.
Sa i përket qarkut të Shkodrës, ajo nënvizoi se vëmendja kryesore është përqendruar te monitorimi i shkarkimeve të lumit Buna dhe liqenit të Shkodrës. “Jemi duke monitoruar shkarkimet me qëllim që të mos kemi situata përmbytjeje në zonat urbane, por edhe në tokat bujqësore”, deklaroi ministrja.
Koçiu theksoi se aktualisht nuk ka problematika dhe situata është nën kontroll. “Aktualisht që flasim, situata është nën kontroll. Nuk kemi problematika”, u shpreh ajo, duke shtuar se koordinimi mes bashkisë, KESH-it dhe strukturave të tjera po funksionon normalisht për të shmangur përmbytje të mundshme.
Sipas saj, monitorimi do të vijojë gjatë natës dhe paraditen e së nesërmes. “Do të monitorojmë reshjet dhe shkarkimet gjatë gjithë natës dhe paraditen e ditës së nesërme, që është një fazë emergjence”, tha Koçiu, duke shpresuar se nga pasditja e nesërme reshjet do të reduktohen dhe situata do të përmirësohet.
Në përfundim, ministrja u bëri thirrje qytetarëve të tregojnë kujdes të shtuar. “I ftoj qytetarët të ndjekin të gjitha rekomandimet dhe këshillat e autoriteteve vendore dhe qendrore gjatë kësaj faze që po kalojmë”, përfundoi ajo.
