Nënkryetarja e Kuvendit, Klodiana Spahiu iu bashkua aktivitetit për Dialog Politik me fokus “Anëtarësimi në BE: Përforcimi i Cilësisë Legjislative Përmes Vendimmarrjes Gjithëpërfshirëse” të organizuar nga IDM (The Institute of Democracy and Mediation). Gjatë fjalës së mbajtur, Spahiu tha se: “Kuvendi e ushtron funksionin e tij në përputhje me Kushtetutën dhe detyrimet ndërkombëtare, duke siguruar mekanizma efektivë monitorimi, raportimi dhe kontrolli parlamentar.”
“Procedura e përshpejtuar nuk cenon kontrollin parlamentar. Ajo përfshin shqyrtimin në komisionet përkatëse, rolin e Komisionit për Çështjet Evropiane në verifikimin e përputhshmërisë dhe votimin në seancë plenare. Pra, bëhet fjalë për një instrument që ndikon në afatet, por jo në standardet e procesit. Në këtë kuadër, dua të theksoj qartë se procedura e përshpejtuar nuk do të aplikohet në mënyrë automatike për çdo projektligj, por vetëm në raste të justifikuara nga dinamika e procesit të negociatave.”, tha nënkryetarja Klodiana Spahiu duke sjellë si shembuj praktikat e ndjekura nga vendet europiane ndërsa u shpreh e hapur për bashkëpunim me të gjitha palët.
“Praktikat europiane dëshmojnë se përdorimi i procedurave të përshpejtuara për legjislacionin e integrimit është një standard i konsoliduar. Kroacia, Sllovenia, Bullgaria dhe Rumania kanë përdorur procedura fast-track, ndërsa Polonia dhe Çekia kanë aplikuar mekanizma si ligjet “omnibus”. Në vendet baltike dhe në Sllovaki është vendosur prioritizimi automatik i legjislacionit të integrimit në kalendarin parlamentar, ndërkohë që komisionet për çështjet evropiane luajnë një rol kyç në garantimin e përputhshmërisë me acquis.”, tha ajo.
Për nënkryetaren e Kuvendit “përvoja e Kroacisë gjatë procesit të anëtarësimit mbetet një model i rëndësishëm referimi.”
“Parlamenti kroat luajti një rol aktiv në miratimin e legjislacionit, mbikëqyrjen e negociatave dhe ndërtimin e konsensusit politik, duke krijuar mekanizma të posaçëm për koordinim dhe kontroll.”, u shpreh Spahiu.
Aplikimi i kësaj procedure, sipas nënkryetares së Kuvendit, nuk përjashton konsultimin publik.
“Detyrimet ligjore për transparencën dhe përfshirjen vijojnë të zbatohen, ndërsa projektligjet publikohen dhe palët e interesuara kanë mundësi të japin kontributet e tyre. Në praktikë, projektligjet e përafrimit janë shpesh të konsultuara që në fazën e hartimit, duke e bërë shqyrtimin parlamentar një fazë të avancuar të procesit.”, pohoi Spahiu duke theksuar se integrimi evropian është një projekt kombëtar.
Të pranishëm në tryezën e organizuar nga IDM ishte dhe ambasadori i BE, Silvio Gonzato, ai i Suedisë Niklas Ström, deputetë të partive politike dhe përfaqësues nga shoqëria civile.
