Ministri i Shtetit për Pushtetin Vendor, Ervin Demo tha sot se 3 bashki të tjera kanë miratuar zonat prioritare në kuadër të Paketës së Maleve.
Gjatë një deklarate për mediet pas mbledhjes së qeverisë, Demo bëri me dije numri i bashkive të cilat kanë miratuar zonat prioritare ka kaluar dy të tretën dhe brenda fundit të majit, do të përfundojë procesi në të gjitha bashkitë e vendit .
“Sot kemi miratuar 3 bashki të reja për sa i përket Paketës së Maleve. Propozimet e ardhura për zonat prioritare janë miratuar për Bashkinë Delvinë, Konispol dhe Pogradec. Tani numri i bashkive ka kaluar në 2/3 dhe në pjesën më të madhe të bashkive ka avancuar faza e aplikimit nga qytetarët, sa i përket Paketës së Maleve, në kontekstin e zonave prioritare dhe të zhvillimit rural. Në javët që kemi përpara do të jenë bashkitë e fundit, dhe besoj që brenda fundit të muajit maj, ne përfundojmë të gjitha bashkitë e vendit, me zonat prioritare të miratuara, ndërsa bashkitë janë në fazën përfundimtare të miratimit të aplikimeve në Këshillat Bashkiakë” tha Demo.
Paketa e Maleve është një program i qeverisë Rama që synon zhvillimin e zonave malore dhe rurale përmes lehtësimit të investimeve të larmishme në turizëm, bujqësi, agroturizëm dhe aktivitete të tjera ekonomike. Programi parashikon identifikimin e zonave prioritare në çdo bashki, ku qytetarët mund të aplikojnë për të përfituar mbështetje dhe lehtësi për projektet e tyre. Synimi i qeverisë Rama është rigjallërimi i zonave malore, frenimi i braktisjes së fshatrave dhe nxitja e zhvillimit rural.
