Ditën e sotme Komisioni i Veprimtarisë Prodhuese ka marrë në shqyrtim dekretin e Presidentit Ilir Meta për paketën “Anti-Shpifje”. Në këtë mbledhje institucioni i Presidentit përfaqësohej nga këshilltari ligjor, Bledar Dervishi, i cili theksoi se dispozitat e paketës ligjore bien në kundërtim me dispozitat kushtetuese që mbrojnë të drejtat e lirisë së medias dhe të shprehjes.
“Forca ushtruese e shtetit do jetë e dyfishtë, një herë me gjobat nga AMA e më pas përmes AKEP. Të gjithë duhet të dëgjojnë deklaratat e Komisionit Europian që nëse nuk reflektohet do të ketë ndikim në procesin e integrimit europian.” -tha Dervishi. Më tej ai shtoi se për këtë çështje duhet pritur edhe opinioni i Komisiot të Venecias.
Ndërsa deputeti i Partisë Socialiste Arben Pëllumbi tha se argumentat e Presidentit nuk janë të qenësishme. “Argumentat e Presidentit nuk janë të qenësishme e për këtë nuk ka pse ta rishqyrtojmë këtë ligj. Gjykoj që të rrëzohet dekreti i Presidentit.” u shpreh Pëllumbi.
Ndërkohë përfaqësuesi i AKEP, Bleron Dokle, sqaroi rastet se kur ky institucion ndërhyn sipas ligjit
“Ligji përpiqet të rregulloje normën e ligjit ekzistues. Ligji thekson se masa administrative do jepet ndaj operatorëve që ofron shërbimin e jo ndaj mediave. Ne nuk merremi dot me përmbajtjen e një faqeje online. Vetëm pas njeë njoftimi nga autoritet përktatëse AKEP përfshihet.”- tha Dokle.
g.kosovari
