Prej kësaj të hëne nisi vaksinimi kundër gripit në të gjitha qendrat shëndetësisë në vend.
ISHP ka shpërndarë 280 mijë doza dhe vetëm në dytë ditët e para janë aplikuar mbi 5 mijë doza. Shefja e programit kombëtar të vaksinimi Rovena Daja thotë për RTSH se vaksina përmban shtamet qarkulluese të viruseve në sezonin gripal.
“Vaksina këtë vit është një vaksinë trevalente, që përmban shtamet A(H1), A(H3) dhe variantin B. Janë këto variante që ne presim të kemi në qarkullim. Janë aplikuar 5 mijë doza deri tani. Megjithatë, çdo ditë do të vazhdojnë të aplikohen edhe më shumë. Duhet të fillojmë të vaksinohemi, sepse moti do të fillojë të ftohet dhe do të fillojmë të kemi grip. Normalisht, nga nëntori dhe dhjetori presim të kemi rritje të fluksit, ndërsa fluksi më i madh pritet në muajin janar. Vaksinimi zakonisht fillon tani dhe mbyllet rreth fundit të marsit ose fillimit të prillit”, u shpreh Daja.
Ekspertët e shëndetit publik rekomandojnë të moshuarit dhe të sëmurët kardiakë të aplikojnë këtë vaksinë, por jo vetëm këto kategori.
“Gratë, shtatzëna, personeli shëndetësor që janë të parët, që tashmë e kanë aplikuar vaksinën, sidomos fëmijët me sëmundje shoqëruese”, tha ajo.
Aplikimi i vaksinës së gripit sipas autoriteteve shëndetësore mbron nga komplikacionet e gripit dhe bën që personat e infektuar ta kalojnë më lehtë.
“Dhe, nëse bie në kontakt me këto tre lloj virusesh, normalisht nuk e kalon ose e kalon me shenja shumë të lehta, por shmang shtrimin në spital dhe, ndërkohë, edhe rrezikun e vdekjes, sepse gripi mund të shkaktojë vdekje, sidomos te personat që kanë sëmundje kronike, që kanë rënie të imunitetit ose që mund të kenë shumë patologji”, theksoi Përgjegjësja e Programit Kombëtar të Vaksinimit, ISHP.
Vaksina anti-grip është falas dhe të parët që po e aplikojnë atë janë personeli shëndetësor.
