“Nuk e shkrova unë letrën e vitit 2015, ku gjendja shëndetësore e Donald Trumpit, asokohe kandidat republikan për president, përshkruhej si ‘e shkëlqyer’”.
Ish-mjeku personal i shefit të Shtëpisë së Bardhë ka bërë një deklaratë të fortë e cila duket se do trazojë shumë ujra. Harold Bornstein tha në një intervistë se ishte vet miliarderi, ai që e diktoi letrën në fjalë.
Bornstein këmbënguli të tregonte se përshkrimi i Trumpit si personi më i shëndetshëm i zgjedhur ndonjëherë në krye të administratës amerikane nuk ishte vlerësimi i tij profesional.
“Zoti Trump e diktoi letrën. Unë thjesht e pranova. Pretendova se kishte humbur 7 kg gjatë vitit të mëparshëm dhe e përshkrova gjendjen e tij kardiovaskulare si të shkëlqyer”, tha Harold Bornstein, ish-mjek personal i Donald Trumpit.
Shtëpia e Bardhë nuk ka bërë asnjë koment mbi këto pohime, të cilat mjeku i shoqëron edhe me informacionin se, shkurtin e vitit 2017, truprojat e Trumpit i kishin bastisur zyrën e kishin marrë prej andej të gjitha të dhënat mjekësore të presidentit. Nuk është e qartë përse Bornstein vendosi të flasë tani për këtë çështje. /a.m.
