Debati i parë publik mes kandidatëve në zgjedhje lokale vjen nga Kamza. Kanë qenë Safet Gjici dhe Xhelal Mziu të cilët kanë zgjedhur studion e gazetarit Ylli Rakipi për të shpalosur jo vetëm projektet e tyre, por edhe për të shkëmbyer akuzat.
Rakipi e ka pyetur Mziun për deklaratën e Ramës që i ka kërkuar takim dhe nuk ka pranuar ta takojë në zyrë pasi e shohin përfaqësuesit e PD.
“Rama është gënjeshtar. Ka gënjyer ashtu siç gënjeu më 23 qershor për krijimin e 300 mijë vendeve të reja pune, apo për rritjen e pagave dhe pensioneve “ – u shpreh Mziu.
Nga ana tjetër, Gjici e akuzoi Mziun se po flet si kryetar i SHQUP-it dhe jos i kreu i Bashkisë Kamëz, duke thënë se ai ka edhe vilën më moderne në Kamëz.
Debati ka qenë i ashpër dhe në fokus ka pasur jo vetëm plagët e Kamzës siç është ujësjellësi apo infrastruktura, por edhe ndihmën ekonomike, taksimin e shumë të tjera.
Xhelal Mziu ka insistuar disa herë duke thënë se politikë e tij është taksimi i ulët i biznesit duke premtuar se në një mandat të mundshëm të tretë të tij, taksat dot ë ulen edhe më shumë.
“Akuzohem për fondet e një rruge, për të cilën nuk ka lidhje Bashkia. Akuzat janë krijuar nga Gjici. Qytetarët ta bëjnë vetë llogarinë. Kompanitë e Gjicit kanë vjedhur 2.2 milionë euro”, ka thënë Mziu.
Kjo shërbeu që debati mes kandidatëve të ashpërsohej, duke akuzuar njëri-tjetrin për abuzime.
‘Unë nuk kam vendim gjykate për abuzime. Vendim gjykate ka për Mziun. Unë nuk kam pasur kompani kur u bëra Prefekt”, u shpreh Gjici.
Tentativa e parë e gazetarit Rakipi për të shtrënguar duart mes dy kandidatëe ka qenë e vështirë, por më pas Gjici dhe Mziu janë bindur ndërsa ky i fundit ka ngritur edhe gishtat.
