Duket se emigrantët po braktisin masivisht portin e Vlorës. Më pak se gjysma e numrit të emigrantëve të vitit të kaluar kanë mbërritur këtë vit në portin e Vlorës, duke iu drejtuar porteve të tjerë në Shqipëri apo Greqi.
Në të njëjtën ditë si sot me vitin e kaluar nga porti i Vlorës kanë hyrë 3203 emigrantë dhe 497 makina udhëtarësh ndërsa sot numri i pasagjerëve ka qenë vetëm 1271 dhe 116 automjete.
Sipas udhëtarëve kjo për shkak të çmimit tepër të lartë që ofron trageti i vetëm i linjës Brindisi-Vlorë-Brindisi, ku qytetarët kanë paguar 70-75 euro për person dhe 80 euro për automjete.
Vitin e kaluar çmimi i biletës ishte më pak se gjysma e asaj aktuale për shkak se ishin dy tragete dhe ishin në konkurrencë.
Qytetarët janë shprehur se përveç çmimit të biletës, mungesa e dhomave dhe çmimi i tyre i lartë ka bërë që qytetarët të shtrihen në korridoret e tragetit apo ku të mundin, gjë e cila është denoncuar dhe me video ku njerëzit janë të detyruar të kalojnë mes pasagjerëve.
Një çift turistësh italianë që vinin për herë të parë kanë ngelur të shokuar nga ajo që kanë përjetuar gjatë udhëtimit duke u shprehur se kjo ishte hera e parë dhe e fundit që vinin në Shqipëri, duke e quajtur një tmerr të vërtetë.
Ndërkohë që një detaj që bie ne sy është se disa pasagjere edhe pse e kane paguar biletën në të njëjtin orar dhe në të njëjtat kushte e kanë prerë me çmime të ndryshme, dikush 70 dhe dikush 75 euro.
BW/d.i.
