Dy persona janë arrestuar në Lushnjë, të dyshuar për shpërndarje të kokainës në qytet. Pas disa muajsh hetime me metoda proaktive, Sektori për Hetimin e Narkotikëve i DVP Fier, në bashkëpunim me Forcën e Posaçme Operacionale, sekuestroi rreth 320 gramë lëndë të dyshuar narkotike kokainë, municion luftarak, peshore elektronike, grirëse bimësh narkotike dhe 6 celularë.
Në kuadër të operacionit u arrestuan E. Sh., 31 vjeç, i cili shpërndante doza kokaine duke përdorur motomjetin me të cilin shpërndante porosi ushqimi, dhe S. Gj., 39 vjeç, i dyshuar gjithashtu për shitje të lëndëve narkotike.
Gjatë kontrolleve në banesat e tyre, policia gjeti sasi të konsiderueshme kokaine, fishekë për armë zjarri, pajisje për ndarjen e dozave dhe disa celularë.
Policia njofton se hetimet vijojnë për dokumentimin e plotë të veprimtarive kriminale dhe identifikimin e personave të tjerë të përfshirë. Materialet procedurale i janë referuar Prokurorisë për veprime të mëtejshme.
