Corinna Schumacher ka rrëfyer disa detaje të panjohura nga fillimet e marrëdhënies së saj me legjendën e Formula 1, Michael Schumacher, duke zbuluar se nëna e saj nuk e kishte mirëpritur lidhjen mes tyre.
Sipas Hello! Magazine, Corinna ka qëndruar pranë bashkëshortit të saj që prej aksidentit të rëndë në ski, të cilin Schumacher e pësoi në vitin 2013. Që nga dalja e tij nga spitali, ajo është kujdesur për shtatë herë kampionin e botës në rezidencën e familjes në Zvicër, duke ruajtur me shumë kujdes privatësinë e tij.
“Nëna ime ishte plotësisht kundër”, është shprehur ajo.
Corinna ka zbuluar gjithashtu një detaj shumë personal nga lidhja e tyre. Kënga “Rush Rush” e Paula Abdul ishte kënga e çiftit në fillimet e romancës.
“Ajo ishte kënga jonë në atë kohë. Kur e dëgjoj sot dhe jam në makinë, qaj me vete”, ka rrëfyer ajo.
Dokumentari fokusohet te sezoni i vitit 1994, kur Schumacher fitoi titullin e parë botëror në Formula 1 me Benetton. Ai do ta përsëriste suksesin në vitin 1995, përpara se të fitonte edhe pesë tituj radhazi me Ferrarin, nga viti 2000 deri në 2004.
Skandali me fotot dhe të dhënat mjekësore
Në dokumentar dhe në rrëfimet e saj ndër vite, Corinna ka folur edhe për përpjekjet e familjes për të mbrojtur privatësinë e Michael.
Vitin e kaluar, tre persona u dënuan pasi kishin tentuar të shantazhonin familjen Schumacher me publikimin e rreth 900 fotografive private, 600 videove dhe të dhënave konfidenciale mjekësore të pilotit, duke kërkuar 12.4 milionë paund në këmbim të mos publikimit të tyre.
“Ajo që më trondit ende më shumë është tradhtia. Ai duhet të marrë një dënim që të shërbejë si paralajmërim për këdo që mund të mendojë të bëjë të njëjtën gjë”, deklaroi ajo.
“Michael na ka mbrojtur gjithmonë, tani ne po mbrojmë Michael-in”
Corinna ka qenë shumë e rezervuar sa i përket gjendjes shëndetësore të bashkëshortit të saj, duke respektuar dëshirën e familjes për ta mbajtur jetën e tij private larg vëmendjes së publikut.
Në dokumentarin Being Michael Schumacher, ajo ka dhënë një nga rrëfimet e rralla për jetën e familjes pas aksidentit.
“Ne po përpiqemi të vazhdojmë si familje, ashtu siç Michael e ka dashur dhe vazhdon ta dojë. Jetojmë së bashku në shtëpi. Bëjmë terapi. Bëjmë gjithçka që mundemi për ta bërë Michael më mirë dhe për t’u siguruar që ai të jetë rehat.
Ne vazhdojmë jetën tonë. ‘Privatja është private’, siç thoshte gjithmonë ai. Për mua është shumë e rëndësishme që ai të mund të vazhdojë ta shijojë jetën e tij private sa më shumë të jetë e mundur. Michael na ka mbrojtur gjithmonë, tani ne po mbrojmë Michael-in”, ka përfunduar Corinna.
