Zbardhet e plotë dëshmia e autorit të vrasjes dje në Kuçovë, ku Vangjel Polovina qëlloi për vdekje Ajet Gunelin. Sipas “News24”, ai ka pranuar autorësinë e krimit, ndërsa ka rrëfyer se si ka ndodhur e gjithë ngjarja.
Ai u shpreh se i kishte marrë me qira viktimës një stallë derrash dhe në pamundësi për t’i paguar qiranë në kesh, i jepte mish derri.
Sipas Polovinës, ai ishte likuiduar me Gunelin, por megjithatë, një natë para krimit viktima e kishte telefonuar duke e ofenduar.
Ai shprehet se më pas mori automjetin e tij, kallashnikovin dhe u nis drejt vendit, ku Guneli pinte kafenë dhe qëlloi drejt tij, duke pranuar se i zbrazi të gjithë karikatorin e kallashnikovit.
“Unë i kisha marrë me qira Ajetit një stallë derrash në fshatin Perondi, ku edhe jetoj. Deri në vitin 2019 i kisha paguar rregullisht të gjitha detyrimet e qirasë, dritave dhe ujit të kësaj godine. Në vitin 2020, isha vonuar në disa muaj pagesash dhe kur erdhi Ajeti nga Anglia disa javë më parë, më kërkoi të takoheshim, – tregon 44-vjeçari. – U takuam dhe pasi i thashë që nuk kisha lekë gjendje për ta paguar, ramë dakord që borxhin në lekë ta likujdoja me mish derri. Dy ditë para vrasjes, i kam dhënë Ajetit 46 kg mish, që korrespondonin në vlerë në lekë me borxhin që i kisha mbetur për 2 muaj e gjysmë qira”.
Sipas dëshmisë, ai thotë se ka menduar që e ka likujduar, por Ajeti e ka marrë në telefon një ditë më vonë, natën para vrasjes.
“Unë nuk e kisha ndjerë telefonin dhe kur u zgjova në mëngjes e pashë që më kishte telefonuar dhe e mora mbrapsht. Sapo ma hapi telefonin, pa më lënë as ta përshëndes, më ka sharë dhe më tha ‘do të vras, do të heq qafe’, – vijon ai. – Në këtë moment, kam hipur në mjetin tim “furgon” dhe në sediljen e pasagjerit vendosa kallashnikovin. Vajta tek lokali ku ai pinte kafen dhe pa zbritur nga makina i thirra për t’u afruar. Ajeti, sapo më pa, më erdhi drejt me vrap, duke më sharë dhe me një karrige në dorë për të më qëlluar, pa e ditur se unë kisha armë me vete. Në këtë moment, kam dalë jashtë me armën në dorë dhe kam qëlluar një herë në ajër për t’u shpërndarë personat e tjerë që ndodheshin në lokal. Ajeti filloi të bridhte me vrap dhe u rrëzua në tokë. Aty kam filluar të gjuaj me breshëri në drejtim të tij dhe më pas shkreha një karikator të tërë kallashnikovi dhe u largova me furgon nga vendngjarja”, – ka thënë në deklaratën e tij në polici, autori i krimit, Vangjel Polovina.
/a.r
