Një 35-vjeçar që drejtonte automjetin në gjendje të dehur u ndalua nga policia rrugore në Tiranë, dhe më tej u arrestua edhe pse tentoi të korruptojë efektivin duke i dhënë ryshfet 2 mijë lekë të rinj.
Nga kontrollet e policisë gjatë mbrëmjes së të premtes dhe orëve të para të së shtunës, u arrestuan në flagrancë edhe dy shoferë për drejtim të makinës në mënyrë të parregullt si dhe u pezulluan 26 patenta për drejtim nën efektin e alkoolit dhe shpejtësi tej normale të lejuara.
Rreth orës 02:50 në rrugën “Xhorxh W Bush” policia i kanë dhënë shenjë ndalimi automjetit tip “Citroen”, i cili fillimisht nuk ju bind shenjës së ndalimit duke u larguar dhe pas ndjekjes nga patrullat u bë i mundur ndalimi i tij në rrugën e “Barrikadave”.
Gjatë kontrollit të dokumentacionit, drejtuesi i mjetit, me iniciale A.M., 35 vjeç, i ka dhënë një kartëmonedhë 2000 lekë të reja agjentit verifikues, për të shmangur verifikimet e mëtejshme dhe ndëshkimin për kundravajtjen e konsumuar.
Menjëherë u bë kapja dhe arrestimi në kushtet e flagrancës për veprën penale të “Korrupsionit aktiv ndaj personave që ushtrojnë funksione publike”, si dhe u përpilua procesverbali i konstatimit të shkeljes për mosbindje ndaj shenjës së ndalimit të oficerit të policisë rrugore dhe drejtim i mjetit nën efektin e alkoolit në masën 0.42 mg/l.
Nga penalizimet e dhëna nga policia, 7 shoferë të tjerë u ndëshkuan për mosrregullim shpejtësie veçanërisht në qendrat e banuara dhe gara me shpejtësi si dhe u penalizuan 8 drejtues mjetesh për xhama të errësuar.
Ndërkohë, në zbatim të Planit Operacional TISPOL 2018 për mjetet debitore, u verifikuan dhe u ndaluan administrativisht 25 mjete për detyrime të pashlyera.
