Hekuran Billa po shkonte me makinën e tij drejt Komunës së Parisit, lagjen më të populluar të Tiranës, për të marrë motrën kur dy persona të maskuar e qëlluan në ecje e sipër.
Ishte ora 22:00 kur 40-vjeçari po afrohej në hyrjen kryesore te një qendre tregtare, nga ku do të dilte e motra, që sapo kishte mbyllur dyqanin e këpucëve që kishte në pronësi.
Një automjet i parkuar dysh, i ka bllokuar rrugën dhe autorët kanë shfrytëzuar rastin për t’i dalë në krah makinës së tij, një BMW X6 .
Hekuran Billa ka tentuar të largohet, duke goditur dy automjete të tjera, por atentatorët e kanë goditur plot 11 herë me një armë automatik MP5, të përshtatur me silenciator.
Kjo foto ekskluzive e siguruar nga Televizoni Klan vetëm pak minuta pas vrasjes, tregon precizionin me të cilin është qëlluar, brenda një perimetri të ngushtë në xhamin e shoferit, të makines me timon anglez.
40-vjeçari ka gjetur vdekjen e menjëhershme. Në momentin e të shtënave në zone ka patur këmbësorë të shumtë, por fatmirësisht u kanë shpëtuar plumbave.
Ky është momenti kur mjekët marrin trupin e Hekuran Billës nga makina BMW për ta çuar në morgun e Tiranës.
Pas ngjarjes autorët janë larguar me një makinë Benz të vjedhur në Kukës, ndërsa targat të vjedhura në Lezhë.
Ka dyshime se një tjetër automjet ka ndjekur lëvizjet e Hekuran Billës në Tiranë, para se ai të shkonte te Komuna e Parisit.
Ndërsa mjeti i përdorur në atentat u gjet i djegur në Prezë të Vogël.
Hekuran Billa kishte vetëm 5 ditë që ishte kthyer nga Belgjika. Në muajin Janar ai kishte hapur një biznes për dhënien e makinave me qira dhe kishte planifikuar ta inauguronte javën e ardhshme.
Burime nga grupi hetimor i thanë televizonit Klan se pista kryesore e hetimeve është ngjarja e ndodhur në Britaninë e Madhe ne vitin 2006, ku Hekuran Billa ka vrarë 20-vjeçarin Prel Marku dhe ka plagosur 3 të tjerë.
Familjarët e Billës janë shprehur në polici se e kanë mbyllur konfliktin e vjetër dhe se Hekurani nuk kishte çështje të hapura, por policia nuk e përjashton këtë ngjarje nga hetimet.
Një pistë tjetër me konflikte të lindura nga aktivitete të paligjshme në Belgjikë dhe Angli, ku disa media shkruajnë se Billa merrej me trafikun e drogës.
18 persona janë shoqëruar si të dyshuar për ngjarjen, por ata kanë mohuar të kenë lidhje me vrasjen dhe janë lënë të lirë.
