Avokati i Popullit, Igli Totozani ka reaguar pas ngjarjes së rëndë në Himarë ku humbi jetën një turist rus, pasi i kaloi sipër një skaf.
Totozani, shpreh dhimbjen dhe trishtimin më të thellë për humbjen e jetës së 43-vjeçarit Denis Kaiumov, nga një motor uji, fare pranë bregut në Himarë.
Totozani shprehet me shqetësim për këtë ngjarje të rëndë, që sipas tij mund të parandalohej nëse autoritetet shtetërore, ato vendore dhe qendrore do të zbatonin ligjin, duke vendosur zonat e limituara për lundrimin me motor uji, por edhe zbatimin e shpejtësisë së tyre në raport me distancën nga bregu.
“Kjo tragjedi, për familjen ruse që erdhi në Shqipëri me pushime, mbetet një kërcënim prezent dhe i përditshëm për çdo pushues shqiptar apo të huaj në bregdetin tonë, gjë që shtron në mënyrë urgjente kërkesën për zbatimin e ligjit në përdorimin e motorëve të ujit, gomoneve dhe mjeteve të tjera lundruese, që janë bërë pjesë e biznesit të argëtimit. Autoritetet vendore duhet të ushtrojnë kompetencat e tyre dhe pas dhënies së licencave për këto biznese duhet të ushtrojnë edhe kontrolle të vazhdueshme për zbatimin e masave të sigurisë”, deklaron Totozani.
Avokati i Popullit i konsideron të panevojshme replikat mes institucioneve lidhur me përgjegjësinë për të garantuar siguri për pushuesit dhe çdo qytetar tjetër në territorin e Republikës së Shqipërisë.
“Këto replika nuk vlejnë përpara humbjes së jetëve njerëzore. Ngjarje të tilla shprehet, pas hetimit nga ana e organeve kompetente, duhet të zbardhin jo vetëm vrasësin, i cili drejtonte motorin e ujit, por edhe përgjegjësit në institucionet zyrtare, të cilët me neglizhencën e tyre lejuan që një tragjedi e tillë të ndodhte”, deklaron Totozani.
Avokati i Popullit iu bën thirrje autoriteteve shtetërore për ndërhyrje të menjëhershme në këtë situatë kaotike të mjeteve lundruese buzë bregut të detit të mbushur me pushues, në mënyrë që të parandalohen tragjedi të tjera.
