Kryeministri Edi Rama është shprehur se, sipas tij, gjatë luftës kundër korrupsionit në vend është krijuar perceptimi se janë të gjithë hajdutë dhe se është bërë nami i zi.
Edi Rama: Kur vjen puna tek perceptimi i korrupsionit ka një koncept që quhet paradoksi i progresit, lidhur me faktin që kur një vend vendos të përshkallëzojë luftën kundër korrupsionit siç bëmë ne, paralelisht me arritjet forcohet perceptimi i korrupsionit. Në vend që të krijohet më shumë besim, qetësi e bindje lidhur me përparimet në luftën kundër korrupsionit, krijohet një atmosferë cinizmi dhe vendosja e gjithçkaje brenda kornizës së korrupsionit.
Kontribuojmë në rritjen e një perceptimi negative që është i përkohshëm dhe i përket kësaj faze që jemi ne. Hyhet në një fazë kur ka brumë telenovela mediatike ku pavarësisht se çfarë thonë arritjet në këtë luftë, që janë të matshme, bëhen të pa vlerësueshme aq dhe ashtu siç duhet.
Sot kemi një mbulim histerik të gjithë temës së korrupsionit, ku këneta është e mbimobilizuar pavarësisht se është subjekt i drejtpërdrejtë, për të spërkatur me llumin e vet gjithçka, këdo dhe vazhdimisht, për ta përdorur llogoren antikorrupsioni përkatësisht SPAK, si një mjet të vetin të luftës politike duke e vendosur në lëvizje përmes presionit të llumit, rrugës së denoncimeve të gjithfarshme dhe shantazhi permanent. Është njëra anë e medaljes, ku krijohet perceptimi që të gjithë janë hajdutë, korrupsioni, këtu është bërë nami i zi.
Ku është zona më e ndotur nga korrupsioni? Aty ku janë paratë publike dhe si përdoren paratë publike nga qeveria e institucionet, përdoren përmes tenderave e garave, aty qëndron një nga betejat për largimin e duarve të korrupsionit nga fondet publike. Sipas BE Shqipëria ka bërë përparimin më të madh në të gjitha vendet e rajonit për prokurimet publike.
