Banorët e fshatrave Mesul, Kimez dhe Kalivare në Pukë kërkojnë shfuqizimin e lejeve për ndërtimin e katër HEC-eve në zonën e tyre, ndërsa kanë depozituar edhe një padi në Gjykatën Administrative. Banorët pretendojnë se për projektet nuk është zhvilluar asnjë dëgjesë publike.
“Uji nuk merret në asnjë lloj mënyre sepse është bërë pabesi”, tha një nga banorët. “Ta kërkojmë anullimin e lejes së koncesionit menjëherë. Unë nuk e di nga ju japin këto leje, se si bëjnë, çfarë bëjnë pa pyetur popullin”, tha një tjetër banor.
Avokati i banorëve, Arbër Raja, thotë se gjatë shqyrtimit të dokumentacionit janë konstatuar një sërë problematikash, duke nisur nga leja mjedisore. Raja thekson se kundërshtimi i banorëve është shprehur edhe përmes një peticioni, të firmosur nga 330 persona.
“Banorët të cilët në fakt kur janë vënë në dijeni të ndërtimit të HEC-it kanë mbledhur 330 firma për ta kundërshtuar. Gjithashtu rezulton se kjo leje nuk është mbajtur me dëgjesën e komplet banorëve të zonës, por sipas informacioneve është mbajtur me dëgjesën e disa individëve të cilët në fakt nuk disponohet një proçesverbal konkret mbledhje që të jetë mbajtur kjo dëgjesë publike”, deklaroi avokat Raja.
Lejet për ndërtimin e HEC-eve në Pukë janë dhënë që prej vitit 2023, ndërsa kanë hyrë në fuqi në dhjetor të vitit 2025, pas plotësimit të dokumentacionit nga kompania BE-IS SHPK.
Deri tani, punimet në terren nuk kanë nisur, ndërsa përveç padisë në Gjykatën Administrative, komuniteti ka bërë edhe kallëzim penal në prokurori, për shpërdorim detyre dhe falsifikim dokumentesh.
