Zgjidhja e çështjeve të së shkuarës në funksion të së ardhmes së përbashkët të projektuar nën ‘ombrellën’ e Bashkimit Evropian do të ulë sot ballëpërballë shefat e diplomacisë së Shqipërisë e Greqisë
Nikos Kotzias i kthen vizitën e Kretës Ditmir Bushatit, në këtë proces të rëndësishëm dialogu treditor mes dy shteteve.
Por ndryshe siç bëri Nikos Kotzias që e çoi delegacionin shqiptar në një Ishull, Ditmir Bushati ka vendosur ta presë atë në Korçë, pak kilometra nga toka greke, në një hotel privat të vogël.
Dy ministritë nuk kanë bërë publike axhendë, por zgjidhja jo rastësore, bën të mendosh që formati do të jetë i njëjtë. Ministrat kokë më kokë, ndërsa grupet e punës ballë për ballë në të njëjtin ambient.
Negociatat mes dy palëve janë ndarë në tre drejtime. Ministri për Evropën dhe Punët e Jashtme, Ditmir Bushati, disa ditë më parë tha se bisedimet dypalëshe ndahen në 3 drejtime: probleme të karakterit historik, të aktualitetit dhe ato që kërkojnë një vështrim nga e ardhmja.
Ligji i luftës, për të cilën janë dhënë sinjale progresi, çështja çame, që në fakt ndan palët, por dhe tema të tjera të marrëdhënien mes dy fqinjëve, priten të jenë në fokus të takimit.
Mekanizmi i bisedimeve mes dy vendeve u krijua dy vjet më parë, dhe palët janë shprehur për progres duke i rezervuar publikut dhënien e detajeve për çështjet që kanë përparuar në negociata gjatë muajve të fundit.
Takimi në Korçë është një ngjarje më shumë se diplomatike, për të cilën pritshmëria është e lartë, edhe në momentin kur Shqipëria pret të hyje në një tjetër stad në Bashkimin Evropian, pjesë e të cilit është Greqia fqinje.
a.ç
