Nga Lorenc Vangjeli
Për arrogancën që vishet me kostum civil.
Eshtë shndërruar pothuaj menjëherë në kryelajmin e ditës: një punonjës policie nxjerr armën përpara një grupi njerëzisht që protestojnë. Filmimi amator tregon çastin e tmerrit në Kukës, qytetarë të revoltuar dhe një grup policësh me uniformë dhe skafandra, që ngjanin po aq të çorientuar sa dhe turma përballë. Një skenë e ligë e cila më së paku do të duhej të ishte shmangur, por që si çdo e keqe, nuk erdhi vetëm për të bërë keq. Por dhe për të dhënë një ndihmë të çuditshme për të kuptuar qoftë kontrastin me të shkuarën, qoftë stadin e ri në të cilin shoqëria shqiptare ka arritur. Duke nisur nga liria që ka shoqëria shqiptare dhe opinioni publik për të gjykuar, por dhe për të ndëshkuar edhe përpara se ketë një qëndrim zyrtar të politikës, majtas apo djathtas. Madje shumë më shpejt se ajo dhe shpesh edhe më saktë se vetë politika që më shumë se për të nesërmen, gjykon për të sotmen dhe ose përfitimin e momentit, ose kapërcimin e hallit të momentit.
Ngjarja e Kukësit shërben si kontrast për të kuptuar se në një shoqëri moderne ndëshkohet edhe nxjerrja e armës nga brezi (në fakt sipas ligjit në ato rrethana as që duhet të ndodhej aty) dhe jo më e shtëna kriminale e armëve. Parë me këtë sy, bataretë tragjike të zjarrit në oborrin e kryeministrisë katër vjet më parë në janar 2011, ngjajnë se kanë ndodhur një shekull më parë. Ngjajnë se kanë ndodhur natën, në periferi të vendit dhe nga një bandë me maska nga ato që grabisnin udhëtarët dhe jo në qendër të Tiranës. Sepse ajo ishte dhe është skenë e pabesueshme.
Pezullimi i policit në Kukës është një standart që nesër do ta bëjë më të vështirë sjelljen arrogante të policit në një cep tjetër të Shqipërisë. Sepse në Shqipëri, qytetarët mund të falin shumë gjëra, mirëkuptojnë madje dhe varfërinë, dhe vështirësitë e jetës, dhe padrejtësi e standarte të dyfishta në gjykim e vlerësim, por e urrejnë arrogancën. Sidomos kur ajo vjen e veshur me pushtet. Dhe në fakt ky është në thelb keqkuptimi i gjithë pushteteve: të kesh pushtet do të thotë të shërbesh dhe jo të shërbehesh! Qoftë kur je me uniformë polici, por në këtë rast është e thjeshtë sepse ndëshkohesh shpejt, siç e bëri ministri me policin e Kukësit, qoftë kur je me kostum politikani, kur është shumë më e vështirë të ndëshkohesh me votë. Edhe pse vota është si ruleta ruse: e shtëna fatale vjen vetëm njëherë në katër vjet.
