Ashtu sikurse pasuria e gjyqtarëve dhe prokurorëve varionte në vlera të ndryshme, njëjtë ndodh dhe me pasuritë e kryebashkiakëve, të cilët nëse do të kalonin në “sitën” e vettingut, nuk dihej se si do të merrte puna.
Rroga nuk është burimi i tyre i vetëm kanë deklaruar ata, por një objektet e dhëna me qera apo dhe nga interesat e llogarive bankare përbëjnë një pjesë shumë të rëndësishme të pasurisë. Më të spikaturit janë kryebashkiakia e Shkodrës dhe ai i Cërrikut, shkruan gazeta “SOT”.
Voltana Ademi ka deklaruar se ka fituar të ardhura ekstra nga tre objekte të dhëna me qera, gjithashtu edhe të ardhura me vlerë 71.362,2 lekë nga Advance DSA për shpenzime jashtë shtetit (Vjenë), në llogarinë pranë Raiffeisen Bank.
Ndërsa kryebashkiaku i Cërrikut i LSI, Altin Toska ka deklaruar se ka fituar të ardhura me vlerë 6.600 euro nga qiraja e apartamentit në shtetin italian, që e ka në bashkëpronësi me bashkëshorten. Ai ka rivlerësuar gjithashtu një pasuri të patundshme tip apartament me sipërfaqe 114 m2 në Durrës, me vlerën 9.314.448 lekë.
Por një tjetër kryebashkiak që ka fituar shuma të mëdha nga qeratë, dhe pse jo në emër të tij, është dhe kryebashkiaku i Vaut të Dejës, Zef Hila. Ai ka deklaruar se i biri i tij Edjon Hila ka siguruar të ardhura vjetore më vlerë 969.477 lekë nga qiraja, sipas kontratës me datë 16.01.2017; të ardhura vjetore me vlerë 8.400 euro nga qiraja, sipas kontratës me datë 15.06.2016; si dhe të ardhura me vlerë 120.000 lekë nga qiraja, sipas kontratës me datë 15.03.2016.
Kryebashkiaku i Klosit, Basir Çupa ka deklaruar se posedon 6 llogari bankare, nga të cilat 2 në bashkëpronësi me bashkëshorten. Ai ka deklaruar gjithashtu se bashkëshortja posedon dhe 3 llogari të tjera bankare. Kryebashkiaku demokrat ka pohuar se ka marrë dhe një kredi prej 2.000.000 lekësh për rikonstruktimin e një apartamenti, nga të cilat ka shlyer 186.872 lekë.
Ndërsa kryebashkiaku i Selenicës, Përparim Shametaj ka deklaruar të ardhura me vlerë 650.000 lekë nga aktiviteti i blegtorisë.
Kreu i Bashkisë së Kukësit, nga ana tjetër, ka deklaruar si të ardhura rrogën e tij dhe të bashkëshortes.
Ndërsa kryebashkiaku i Tropojës, Besnik Dushaj ka deklaruar të ardhura të shumta nga bashkëshortja, e cila sipas deklaratës së pasurisë, posedon llogari të shumta bankare.
Eduard Karpi i Bashkisë Pogradec,ka deklaruar pakësim të të ardhurave gjatë 2017.
Ndërsa Agron Kapllanaj i Bashkisë Mallakastër, ka deklaruar gjendje me vlerë 797.852 lekë në llogarinë e pagës pranë Raiffeisen Bank.
Kryebashkiaku i Dropullit, Ahilea Deçka ka deklaruar po ashtu një depozitë me vlerë 296.761 lekë pranë Tirana Bank.
Ndërsa kryebashkiaku i Lezhës, Fran Frokaj ka deklaruar të ardhura me vlerë 5.035 lekë nga interesat mbi depozitën pranë Union Bank.
Sa i takon kryebashkiakut të Devollit, Bledjon Nallbanit, edhe ky ka deklaruar se ka pasur të ardhura vetëm pagën e tij dhe të bashkëshortes.
a.ç
