Një rrjet televiziv amerikan do të anulojë teletransmetimin e konkursit të bukurisë “Miss SHBA”, event ku një nga bashkëpronarët është edhe kandidati për President i Shteteve të Bashkuara, Donald Trump. Veprimi i rrjetit “Univision” bëhet në shenjë proteste kundër deklaratave që Trump ka bërë për meksikanët.
Ditën e djeshme, “Univision” njoftoi se do ta përfundojë marrëdhënien e biznesit me Organizatën e Miss Universit, ku ka aksione Trump. Por një Mis shqiptar i ka dalë atij në mbrojtje. Polikseni Manxhari, shqiptarja që ka marrë kurorën si “Miss Masaçusets” dhe do të përfaqësojë shtetin amerikan në eventin “Miss ShBA” më 12 korrik, ka mbrojtur kandidatin për President, Donald Trump, pas anulimit të evenimentit të bukurisë.
“Do ta merrja në konsideratë dhe jo për faktin se ai mund të bëhet shefi im i ardhshëm”, tha Polikseni për “Track”. “Ai është një biznesmen i madh dhe e di cila është më e mira për Amerikën. Nëse morali i tij përputhet me timin, me siguri do ta merrja në konsiderat për ta votuar”.
Vetë Trump u kundërpërgjigj ndaj këtij veprimi, duke thënë se do ta padisë rrjetin televiziv. Kur shpalli kandidimin për President, ai bëri disa komente negative për emigrantët meksikanë: “Ata kanë shumë probleme”, tha ai. “Na sjellin drogën, krimin, janë përdhunues”, duke shtuar, “epo, disa prej tyre, janë njerëz të mirë”.
