Gjermanët votuan të dielën, 20 shtator, në zgjedhjet rajonale në Berlin dhe Mecklenburg-Pomeraninë Perëndimore, në një proces që mund të sjellë tronditje të reja për qeverinë e kancelarit Friedrich Merz.
Merz ka thirrur një takim urgjent me drejtuesit e partisë së tij, CDU, për të diskutuar rezultatet e para. Ai ka anuluar edhe disa angazhime të tjera dhe nuk mori pjesë në Asamblenë e Përgjithshme të OKB-së, për t’u përqendruar te zhvillimet politike në vend.
Partia e ekstremit të djathtë AfD pritet të rrisë mbështetjen në të dyja zgjedhjet. Dy javë më parë, AfD shënoi një rezultat të fortë në Saksoni-Anhalt, duke mposhtur CDU-në dhe duke shtuar presionin ndaj Merz.
Në Mecklenburg-Pomeraninë Perëndimore, gara kryesore zhvillohet mes SPD-së së kryeministres rajonale Manuela Schwesig dhe AfD-së. Sipas sondazheve të publikuara nga ZDF, AfD kishte 36 për qind, ndërsa SPD 37 për qind. CDU-ja e Merz ishte vetëm në 6 për qind, pranë pragut prej 5 për qind që nevojitet për të hyrë në parlamentin rajonal.
Në Berlin, CDU-ja përballet me një garë të ngushtë me partinë e majtë Die Linke, e cila ka premtuar masa të forta për të përballuar krizën e strehimit.
Rezultatet e dobëta të CDU-së do të shtonin presionin ndaj Merz, i cili prej muajsh po përballet me rënie të mbështetjes dhe vështirësi në zbatimin e reformave ekonomike dhe sociale.
Kur mori detyrën në maj 2025, Merz premtoi të rimëkëmbte ekonominë gjermane, të forconte ushtrinë dhe të ulte emigracionin e parregullt.
Megjithatë, sondazhet kombëtare tregojnë se AfD ka kaluar në avantazh, ndërsa vetëm 13 për qind e gjermanëve në një sondazh të shtatorit deklaruan se ishin të kënaqur me punën e Merz. Sipas institutit Infratest Dimap, ky është niveli më i ulët i mbështetjes i regjistruar për një kancelar në detyrë.
Problemet e qeverisë lidhen edhe me zhvillimet ndërkombëtare. Lufta në Ukrainë dhe konflikti në Lindjen e Mesme kanë ndikuar në rritjen e çmimeve të energjisë, ndërsa Gjermania po përballet gjithashtu me konkurrencë më të madhe nga Kina dhe me nevojën për rritje të shpenzimeve për mbrojtjen.
Pavarësisht presionit politik, analistët vlerësojnë se Merz mund të përballojë krizën dhe të qëndrojë në detyrë deri në përfundimin e mandatit në vitin 2029.
