Kryeministri Edi Rama foli sot në podcastin e tij për përfitimet që mund të kenë individët e interesuar për të investuar në agroturizëm përmes “Paketës së Maleve”.
Duke marrë si shembull historinë e Entelës, e cila u kthye së bashku me familjen në Koman për të ngritur një bujtinë, Rama tha se “Paketa e Maleve” është krijuar pikërisht për të mbështetur familje të tilla që duan të investojnë dhe të zhvillojnë zona të thella të vendit.
Kryeministri u ndal edhe te problematikat që lidhen me regjistrimin e pronave, duke theksuar se “Paketa e Maleve” mund të ndihmojë edhe qytetarët që përballen me probleme të tilla.
Numri një i kabinetit ka sqaruar më herët pikëpyetjet e ngritura rreth “Paketës së Maleve”, duke iu përgjigjur pretendimeve dhe paqartësive që kanë qarkulluar lidhur me këtë nismë. Rama ka theksuar se paketa nuk është krijuar për oligarkët, investitorët e huaj apo personat e pasur, por synon kryesisht zgjidhjen e problematikave të pronësisë për tokat e trashëguara në zonat malore.
Sipas sqarimit të tij, një nga kushtet kryesore është që personi të dëshmojë se e ka poseduar realisht tokën për të paktën 10 vite. Në këtë mënyrë, pronarëve u krijohet mundësia të formalizojnë pronësinë dhe ta përdorin tokën për zhvillim ekonomik.
