Presidenti i Autoritetit Palestinez, Mahmoud Abbas, nuk do të jetë i pranishëm në Asamblenë e Përgjithshme të OKB-së që zhvillohet muajin e ardhshëm në Nju Jork, pasi Shtetet e Bashkuara i kanë anuluar vizën atij dhe rreth 80 zyrtarëve të tjerë palestinezë.
Vendimi është konfirmuar nga Departamenti Amerikan i Shtetit, ndërsa sekretari i jashtëm Marco Rubio deklaroi se udhëheqja palestineze “ka minuar përpjekjet për paqe” dhe po ndjek “njëanshmërisht” rrugën e njohjes së një shteti palestinez të supozuar.
Lëvizja konsiderohet e pazakontë, pasi SHBA, si vend mikpritës i Kombeve të Bashkuara, është e detyruar sipas Marrëveshjes së Selisë të lejojë pjesëmarrjen e të gjithë zyrtarëve në sesionet e OKB-së, pavarësisht marrëdhënieve të tyre dypalëshe me Uashingtonin.
Vendimi vjen në një moment kur vende si Franca, Britania, Kanadaja dhe Australia kanë sinjalizuar se do të njohin zyrtarisht shtetin palestinez, duke i dhënë kësaj lëvizjeje të SHBA-së një ngarkesë të fortë politike.
Zyra e Abbas e cilësoi vendimin si një shkelje flagrante të së drejtës ndërkombëtare, duke kujtuar se Palestina është anëtare vëzhguese në OKB që nga viti 2012. Ambasadori palestinez në OKB, Riyad Mansour, kishte njoftuar më herët se Abbas do të udhëhiqte delegacionin palestinez në Nju Jork, por tani kjo nuk është më e mundur.
Izraeli përshëndet vendimin
Në krahun tjetër, Izraeli e përshëndeti vendimin amerikan. Ministri i Jashtëm Gideon Sa’ar e quajti vendimin “të justifikuar”, ndërsa kryeministri Benjamin Netanyahu e përsëriti qëndrimin e tij se njohja e një shteti palestinez do të ishte “shpërblim për terrorizmin e Hamasit”.
Rubio akuzoi gjithashtu Autoritetin Palestinez dhe Organizatën për Çlirimin e Palestinës (PLO) se nuk mund të konsiderohen partnerë për paqe, për aq kohë sa nuk dënojnë sulmet terroriste si masakra e 7 tetorit, nuk ndalojnë “nxitjen e terrorizmit përmes sistemit arsimor” dhe vazhdojnë të bëjnë padi kundër Izraelit në gjykatat ndërkombëtare.
Nga ana e tij, zëdhënësi i OKB-së, Stéphane Dujarric, bëri të ditur se do të ketë komunikim me autoritetet amerikane, duke theksuar se “është thelbësore që të gjithë anëtarët dhe vëzhguesit e përhershëm të jenë të përfaqësuar në Asamblenë e Përgjithshme”, veçanërisht në sesionin e posaçëm për zgjidhjen me dy shtete, i cili do të bashkë-organizohet nga Franca dhe Arabia Saudite.
Vendimi i Uashingtonit ngre pikëpyetje për respektimin e detyrimeve ndërkombëtare nga SHBA si vend mikpritës i OKB-së, në një kohë kur çështja palestineze po hyn në një fazë të re ndërkombëtare, me gjithnjë më shumë vende perëndimore që afrohen drejt njohjes zyrtare të shtetit palestinez.
