Një hetim i Prokurorisë së Tiranës ka nxjerrë në dritë një skemë të mirëfilltë të pastrimit të parave. Në qendër të hetimit ishte Kristian Koni, i cili e kishte ndryshuar disa herë identitetin.
Emrin e fëmijërisë e kishte Olsi Meta, e ndryshoi më pas në Kristian Meta dhe së fundmi, në Shqipëri përdori emrin Kristian Koni.
Ndërkohë, hetimet e Prokurorisë kanë zbuluar se i njëjti person ka përdorur edhe dy emra lituanez, kjo me qëllim që të shmangte arrestimin e autoriteteve të huaja, ku Meta njihej si kapobandë. 45- vjeçari ka qenë i skeduar disa herë dhe po kaq herë ka tentuar që të shmangte arrestimin.
Por, mendja e tij djallëzore ka sjellë që ai të “vjedhë” edhe emrin e një basketbollisti të njohur lituanez Kelys Zydrunas.
VoxNews ka shfletuar vendimin e Gjykatës së Tiranës për sekuestrimin e pasurive të Olsi Metës. Sipas saj, “në funksion të këtij hetimi janë evidentuar edhe disa korrespondenca lidhur me veprimtarinë kriminale të shtetasit Kristian Koni, ku theksohet se në të dhënat e Interpol-it ky shtetas rezulton i përfshirë në aktivitet kriminal për veprën penale ‘trafik droge’ gjatë periudhës 2007–2012 në Itali”.
Më tej, në paragrafin tjetër, në vendim shkruhet se në Itali shtetasi njihet me alias Zdanaivicius Ramunas, lindur më 28.07.1980. VoxNews kërkoi me këtë emër në rrjete sociale dhe internet, ku rezulton se ekziston edhe një emër i njëjtë. Ka dyshime se identiteti është marrë nga interneti dhe më pas është bërë një pasaportë.
Ndërkohë, në të njëjtin vendim të siguruar nga VoxNews, shkruhet se Olsi Meta njihej edhe me emrin Kelys Zydrunas, lindur më 29 prill të vitit 1987. Nëse do të bëjmë një kërkim në internet me këto gjeneralitete, del se ky emër i përket një basketbollisti të njohur lituanez. Madje, edhe data e lindjes është e njëjtë, pasi edhe basketbollisti e ka më 29 prill 1987. Një mëndje djallëzore e një personi që arriti të fusë në Shqipëri dhjetëra miliona euro të deklaruara, ndërkohë që dyshimet janë se dhjetëra miliona të tjera janë në emra të personave të tjerë.
Në Wikipedia, emri i Kelys Zydrunas, figuron si një basketbollist që ka luajtur edhe me ekipet e moshave të Lituanisë. Madje emri i tij, si dhe data e viti i lindjes, janë të “gdhendur” edhe në faqen e FIBA-s.
Mësohet se Kelys e filloi karrierën e tij në klubin “Buratina” të Kaunasit dhe në vitin 2005, basketbollisti kaloi te ekipi i mirënjohur “?algiris”. Më pas ka kaluar në disa ekipe të tjera si në Lituani ashtu edhe në Rusi.
Duket se, nisja e karrierës për Kelys ka përkuar edhe me “karrierën” e Olsi Metës, pasi hetimet e Prokurorisë së Tiranës kanë zbuluar se ai ka qenë i përfshirë në një grup kriminal që vepronte në trafikimin e lëndëve narkotike në Itali gjatë periudhës 2007–2012, si dhe janë konstatuar ndryshime gjeneralitetesh dhe përfshirje në transaksione me pasuri të luajtshme dhe të paluajtshme me anomali financiare dhe veprime të dyshimta të lidhura me burime kriminale.
