Të paktën katër persona kanë humbur jetën dhe një tjetër është plagosur nga përmbytjet e shkaktuara prej stuhisë Adam në Francë.
Reshjet e dendura kanë përfshirë jugun e vendit, duke përmbytur rrugë, ndërprerë transportin dhe detyruar dhjetëra banorë të largohen nga banesat e tyre. Ndërkohë, autoritetet paralajmërojnë për mot të keq edhe në ditët në vijim.
Stuhia Adam goditi jugun e Francës të martën, duke shkaktuar përmbytje të gjera dhe dëme në disa zona. Sipas raportimeve, mes viktimave janë dy gra, përkatësisht 86 dhe 26 vjeçe, të cilat u gjetën të mbytura në një bodrum në departamentin Bouches-du-Rhône.
Moti i keq goditi edhe ishullin e Korsikës, ku një automjet fuoristradë 4×4 u mor nga rrjedha e ujërave të përmbytjes. Njëri prej pasagjerëve arriti të dilte përmes një dritareje, ndërsa një burrë tjetër u gjet i vdekur. Autoritetet nuk kanë bërë publike detaje të mëtejshme për viktimën e katërt. Në qytetet Mouriès dhe Saint-Martin-de-Crau, mes Montpellier dhe Marsejës, dhjetëra banorë u detyruan të kërkonin strehim në qendra emergjente për shkak të përmbytjeve.
Autoritetet raportuan gjithashtu një person të plagosur në këtë zonë. Përmbytjet kanë shkaktuar ndërprerje të qarkullimit rrugor dhe të linjave hekurudhore. Ministri francez i Transportit, Philippe Tabarot, konfirmoi ndërprerjet përmes një postimi në rrjetin social X.
Situata është veçanërisht e rëndë në departamentin Bouches-du-Rhône, ku niveli i ujit ka arritur shifra të pazakonta. “Uji është rritur në nivele të papara”, deklaroi të mërkurën prefekti i departamentit, Jacques Witkowski. Ai shprehu solidaritetin me personat e prekur nga përmbytjet dhe theksoi se autoritetet janë mobilizuar për të përballuar situatën.
“Një mendim për të gjithë ata që janë në vështirësi. Ne jemi të mobilizuar në një nivel të jashtëzakonshëm për të zgjidhur disa çështje”, u shpreh Witkowski. Ndërsa ekipet e emergjencës vijojnë përpjekjet për menaxhimin e pasojave të stuhisë Adam, Franca pritet të përballet me një tjetër sistem të fuqishëm atmosferik. Stuhia Austen, e cila po lëviz nga Atlantiku, pritet të prekë veriperëndimin e vendit, duke sjellë erëra të forta dhe kushte të vështira atmosferike.
Shërbimi meteorologjik francez, Météo-France, ka lëshuar një paralajmërim portokalli për erëra të forta në pesë departamente perëndimore, nga mbrëmja e së enjtes deri të premten. Paralajmërimi përfshin Côtes-d’Armor, Finistère, Morbihan, Ille-et-Vilaine dhe Manche.
