Ministri për Evropën dhe Punët e Jashtme, Ferit Hoxha, në fjalën e tij në panelin “Rruga përpara, nga komunikimi tek bashkëveprimi” në kuadër të Samitit të IV të Diasporës, theksoi nevojën për një qasje më të strukturuar dhe të koordinuar ndaj diasporës shqiptare.
Hoxha deklaroi se një nga sfidat kryesore mbetet krijimi i një “atlasi” të aktiviteteve të diasporës, që do të evidentojë kontributet dhe angazhimet e komuniteteve shqiptare në vende të ndryshme si SHBA, Kanada, Suedi, Spanjë dhe Zvicër.
Sipas tij, ky hap do të shërbejë për të krijuar një pasqyrë më të qartë mbi energjinë dhe veprimtarinë e diasporës, edhe pse modest në ndikim fillestar.
“Një nga sfidat e mia ka për të qenë një Atlas, i gjithë aktiviteteve që diaspora e ka bërë dhe pa ne, ose me ne. Unë shpresoj t’i bëjmë bashkë me përfaqësitë diplomatike. Por ta fillojmë me një atlas që të dimë çfarë bëhet në Kanada, Suedi, SHBA, Spanjë, Zvicër, kudo ka aktivitetet, shoqata, grupe individë.
Këto janë aktivitete ku shpaloset energjia dhe vrulli i komuniteteve tona. Hap modest që nuk do ndryshojë ndonjë gjë të madhe por do japë një pasqyrë më të qartë se çfarë bëhet ku.
Kemi rrjet të pafundmë shoqatash që janë krijuar sipas vullnetit, dëshirës dhe planeve të atyre q ëi kanë krijuar,por s’kemi rrjetëzim. Janë të palidhura. Hajde të shohim s’i t’i bëjmë për të komunikuar. Ne s’mund të veprojmë me diçka që se njohim” u shpreh ai.
Ministri u ndal edhe te strategjia e re për diasporën, duke theksuar se ajo është ende në proces dhe synon të përfshijë sa më shumë ide dhe kontribute nga vetë komunitetet shqiptare jashtë vendit. Ai ftoi diasporën të bëhet pjesë aktive në hartimin dhe zbatimin e saj.
Hoxha sqaroi gjithashtu ndryshimet në strukturën institucionale, duke theksuar se bashkimi i çështjeve të diasporës me Ministrinë për Evropën dhe Punët e Jashtme nuk përbën ulje në rëndësi, por një mënyrë për të rritur prioritetin dhe koordinimin në politikat e jashtme.
“Ne nuk kemi thjesht një diasporë, por një Shqipëri jashtë kufijve, me talente që kanë ndërtuar jetën e tyre diku tjetër”, tha ai, duke nënvizuar rëndësinë e përfshirjes së tyre si aktorë në zhvillimin e vendit.
Hoxha theksoi se sfida mbetet rritja e koordinimit, koherencës dhe matja konkrete e rezultateve në bashkëpunimin me diasporën, ndërsa rikonfirmoi angazhimin për ta çuar Shqipërinë drejt Bashkimit Evropian dhe për të sjellë standardet evropiane në vend.
