Kryeministri Edi Rama ka shpërndarë në rrjetet sociale projektin e Sheshit të ri të Flamurit në Vlorë. Kreu i qeverisë thotë se ky investim do t’i japë qytetit bregdetar një tjetër pjesë të bukur.
Po ashtu, prioritet do të ketë gjelbërimi dhe do të dalin në pah objektet historike. Ndërkohë monumenti i Pavarësisë do të lidhet me një qilim të kuq prej guri me një “tempull” hijezues, që sipas Ramës do të shërbejë për panaire, ekspozita e shfaqje artistike.
Ai i ka kthyer përgjigje akuzave të opozitës dhe ka thënë se nuk do të shërbejë si terminal autobusësh për foltorexhinjtë.
“Dhe me Sheshin e Ri të Flamurit, i cili do t’i shtojë Vlorës një tjetër pjesë të bukur të mozaikut gjithnjë e më tërheqës të Rilindjes së saj Urbane, ku do të mësyjë gjelbërimi, ku do të dalin në pah me të gjithë shkëlqimin e tyre objektet e historisë në atë shesh, ku një qilim i kuq prej guri do të lidhë monumentin e Pavarësisë me “tempullin” hijezues që do të shërbejë për panaire, ekspozita, shfaqje artistike e të tjera (po vetëm si terminal autobusësh për foltorexhinjtë jo) dhe ku fantazma e ish-hotelit do të kthehet në qendrën më të madhe social – kulturore të vendit për të gjitha moshat, pa harruar aksin e rikonceptuar që lidh edhe varrezat e dëshmorëve me monumentin e Pavarësisë përmes kolonatave të “tempullit” hijezues, ju uroj një ditë të mbarë”, shkruan Rama.
/a.r
