Situata para objekteve të institucioneve qendrore në Prishtinë është përshkallëzuar mbrëmjen e sotme pasi Policia e Kosovës u detyrua të përdorë gaz lotsjellës për të shpërndarë protestuesit që kishin bllokuar hyrjet e Kuvendit të Kosovës.
Tensionet u rritën kur një grup protestuesish rrethuan hyrjet kryesore të ndërtesës së Kuvendit me qëllim që të parandalonin daljen e deputetëve nga objekti. Përveç bllokadës, në drejtim të ndërtesës së Qeverisë u hodhën edhe fishekzjarrë dhe mjete të tjera piroteknike.
Për t’i bërë ballë situatës dhe për të garantuar sigurinë e zyrtarëve, Policia e Kosovës ndërhyri duke përdorur gaz lotsjellës. Paralelisht, autoritetet e sigurisë vendosën pjesëtarë të Njësisë Speciale në pjesën e përparme të objektit të Qeverisë, duke ngritur nivelin e sigurisë në perimetrin e institucioneve.
Si pasojë e tensioneve të përshkallëzuara në rrugë, në rrugën “Agim Ramadani” u dogjën disa kontejnerë mbeturinash, duke shkaktuar tym dhe pengesa në qarkullim. Policia e Kosovës vazhdon të qëndrojë në terren për të mbajtur nën kontroll situatën dhe për të parandaluar incidente të mëtejshme.
