Ministria e Jashtme e Rusisë ka reaguar pas vendimit të Qeverisë shqiptare për të shpallur non grada diplomatin rus, Alexey Krivosheev për shkelje të masave anti-COVID.
Sipas RIA Novosti, zv.ministri i jashtë rus, Alexandër Grushko ka deklaruar se Rusia do t’i përgjigjet Shqipërisë për dëbimin e diplomatit.
“Ky është një provokim i qartë që synon përkeqësimin e marrëdhënieve ruso-shqiptare dhe, natyrisht, ky hap jo miqësor nuk do të mbetet pa përgjigje,” komentoi Grushko.
Një nga parimet kryesore në diplomaci është reciprociteti, askush nuk e anuloi atë, tha më tej ai.
Qeveria Shqiptare njoftoi dje shpalljen person të padëshirueshëm, diplomatin rus Alexey Krivosheev, me argumentin se ky i fundit ka shkelur në mënyrë të vazhdueshme të gjitha masat anti-COVID. Në deklaratën zyrtare të Ministrisë së Jashtme, thuhet se në drejtim të Krivosheev ka pasur ankesa dhe denoncime të vazhdueshme dhe pavarësisht paralajmërimeve të bëra, diplomati nuk ka reflektuar, madje ka vijuar me sjelljen e tij neglizhuese. Një gjë e tillë, sipas ministrisë ka nisur që në prill të 2020, në muajin e parë të pandemisë, si edhe ka vijuar edhe në fillim të këtij viti, pavarësisht paralajmërimeve të shumta që kishte marrë.
Kjo është hera e parë që një diplomat rus përjashtohet këtë vit, shkruan më tej media ‘RIA’. Në vitin 2020, hapa të tillë u ndërmorën në Bullgari, Hollandë, Austri, Sllovaki dhe Republikën Çeke, mirëpo për akuza për spiunazh.
g.kosovari
Shume mire ja kane bere.Ne cdo vend ka rregulla dhe te gjithe pa perjashtim edhe diplomatet e huaj duhet te respektojne rregullat e vendit ku jane.