Partia Social Demokrae mblodhi sot Këshillin Kombëtar nën drejtimin e kreut të saj Skënder Gjinushi. Mbledhja e sotme e kësaj partie u zhvillua pas një konfllikti brenda kësaj force. Ditën e hënë Sekretari i Përgjithshëm dhe kryetari i PSD tentuan të zhvillojnë një mbledhje kryesie për të propozuar mocion për shkarkimin e kryetarit Gjinushi, por nuk mundën të hyjnë në ambjentet e selisë së partisë. Këta zyrtarë u pezulluan sot nga detyrat që mbanin në PSD.
“Këshilli vendosi: e para miratoi marrëveshjen me kryeministrin dhe PS-në. E dyta ka vendosur të mbledhë aktivin diku nga qershori dhe pastaj do të caktohet edhe kongresi dhe e treta sigurisht duke i dënuar këto veprime, pasi asnjë anëtar këshilli nuk kishte të hënën, ishte një provokacion i qartë. Masat për njerëzit që provokuan këtë, Muhamend Gaba lirohet nga detyra për veprimet e tij në kundërshtim me çdo lloj norme dhe etike. Zoti Rustemi ka ofruar një tërheqje si sekretar, funksionet e tjera…, partia i njeh kontributet e tjera. Nga posti i sekretarit është i pezulluar edhe me pëlqimin e tij”, deklaroi kryetari i PSD Skënder Gjinushi.
I pyetur nga gazetarët nëse nuk janë lejuar anëtarë të këshillit të hyjnë në mbledhje, Gjinushi dha këtë përgjigje.
“Askush nuk është penguar të futet në godinë. Janë ndaluar të hyjnë njerëz që nuk ishin të këshillit. Këshilli është ky”, tha Gjinushi.
