Nga Ardit Rada
Zgjedhjet e fundit prodhuan dy drama në partitë kryesore pas asaj që realisht doli forcë e parë. Marrja e 74 mandateve nga Partia Socialiste bëri që shpresat për t’u bërë pjesë e qeverisjes së ardhshme të shuhen si në Partinë Demokratike, ashtu edhe në Lëvizjen Socialiste për Integrim. Madje sipas çfarëdolloj kalkulimi, një koalicion i këtyre të dyjave si tentativë për largimin e Ramës nga politika, nuk arrin dot numrat.
Duket se rezultati i zgjedhjeve prodhoi dy drama paralele në forcën e dytë dhe të tretë politike pas 25 Qershorit. Madje, PD doli forcë e tretë në Berat, ndërsa LSI doli forcë e katërt në Shkodër, Elbasan dhe Dibër. Këto goditje, por edhe humbja e bastit me veten se Rama nuk do t’i arrinte 71 mandate me këtë sistem zgjedhor kanë bërë tashmë që PD dhe LSI të jenë pa kryetarë.
Ndërkohë që Lulzim Basha e ka “ngrirë” funksionin e tij politik duke shpallur garën për kryetar të Partisë Demokratike, kreu i LSI Petrit Vasili ka dhënë dorëheqjen. Një akt shumë demokratik në pamje të parë, por aspak i dhimbshëm kur mendon se qëndroi si i tillë vetëm 1 muaj e gjysmë.
Tashmë kemi një garë të stisur në Partinë Demokratike ku në kundërshtim me statutin, Basha po nxiton t’i shmanget analizës së humbjes dhe ballafaqimit me forume. Duke larë duart si Pons Pilati, “kryetari i ngrirë” po përpiqet ta legjitimojë pozicionin e tij në krye të PD-së. Këtë herë si i zgjedhur pavarësisht humbjes dhe jo si i emëruar nga Berisha, sikurse ndodhi 4 vitë më parë. Përballë Bashës qëndrojnë “rebelët” që më shumë sesa mllef, po shfaqin këmbëngulje për të mos i bërë gjërat rrëmbimthi.
Në dramën e LSI-së priten zhvillime të reja. Sikurse Petrit Vasili u zgjodh me vrull në një Konventë me ngritje duarsh dhe jo me votë, ashtu pritet të ndodhë edhe zëvendësimi i tij.
LSI njoftoi zyrtarisht se do të jetë Monika Kryemadhi kandidatura zyrtare për postin e kryetarit. Një zgjedhje kjo që nuk krijon asnjë problem sa i përket vetë Lëvizjes Socialiste për Integrim, por që hedh hije dyshimi për përplesjen institucionale që krijon me kreun e ri të shtetit, duke qenë se Kryemadhi është bashkëshortja e Ilir Metës.
Orët dhe ditët në vazhdim do t’i vënë disa pika mbi “i”-të e pafundme të opozitës së re, që lindi një ditë të nxehtë qershori. /JavaNews
