Kryeministri bullgar Boyko Borissov ka raportuar marrjen e një zarfi që përmbante një plumb dhe fotografinë e tij – si dhe mesazhe kërcënuese të lëna në ndërtesën e qeverisë, raportoi të hënën Radio Kombëtare Bullgare.
Borissov të hënën konfirmoi për median se ai ishte kërcënuar por refuzoi të jepte detaje konkrete rreth formës së saktë të kërcënimeve. “Nuk ishte as e para e as e fundit herë [marrja e kërcënimeve me vdekje]” tha ai.
Sipas Borissov, motivet e mundshme për kërcënimet me vdekje janë lufta që ai po bën kundër tregtisë kontrabandë dhe korrupsionit.
“Kur mbledh 3 miliardë [leva] nga kontrabanda, bllokon prokurimet publike për 1.5 miliardë [leva] dhe heq dikë nga puna çdo ditë, duhet të mbash mbi shpatulla përgjegjësinë,” tha Borissov, duke iu referuar heqjes së drejtorit të Agjencisë Shtetërore për Refugjatët.
Gjatë javës së shkuar, qeveria anuloi prokurimet publike me vlerë prej 1.7 miliardë levash në një përpjekje për të sqaruar drejtësinë dhe transparencën e tyre.
Disa nga prokurimet e ndaluara në infrastrukturë përfshijë kompani të politikanit dhe manjatit të medias Delyan Peevski dhe biznesmenë të tjerë polemikë, si për shembull atë të Lukoil Bulgaria, Valentin Zlatev.
Kërcënimet e pretenduara për jetën e Borissov u lajmëruan në të njëjtën ditë kur Peevski u vu nën mbrojtje të veçantë pas raportimeve se po planifikohej vrasja e tij.
Borissov tha se ai ishte informuar për rreziqet e jetës së Peevskit dhe se masat ishin marrë.
Ai shtoi se nuk shqetësohej për sigurinë e vet dhe se ndihej i qetë dhe besimplotë në lidhje me drejtësinë e veprimeve të fundit të qeverisë.
“Ne kemi pasur raste të tilla në Ballkan dhe në Bullgari – një ish kryeministër Andrey Lukanov, vrarë në 1996 – ndaj nuk duhet të nënvlerësojmë asgjë,” tha ai.
“Por nëse ndokush mendon se do të më frikësojë dhe do të më ndalojë që ta lejoj të bëjë sipas dëshirës, kjo nuk do të ndodhë,” theksoi Borissov./ PBirn
