Ish-pronarët nisin të blejnë pronat e tyre. Duket si paradoks, por ky është lajmi më i fundit që bëhet i ditur për JAVANEWS nga disa ish- pronarë. Sipas tyre, vite të tëra duke trokitur sa në një derë në një tjetër të komisioneve të kthimit të pronave, gjyqeve të panumërta në gjykatat shqiptare, si dhe odiseja e kalvari i pritjes së dëmshpërblimeve për tokat e zëna që janë ndarë sipas ligjit 7501, kanë krijuar jo pak drama, strese, por dhe zhgënjime të panumërta.
Në këto rrethana, ish- pronarët janë detyruar të mendojnë si rrugëzgjidhje riblerjen e pronave të tyre. Tokat që ish- pronarët po blejnë më së shumti janë në rrethinat e Tiranës, Fushë- Krujës, Niklës etj. Qëllimi kryesor, sipas ish- pronarëve, është jo vetëm rikthimi nën zotrim të këtyre pronave, por edhe zhvillimi i sipërfaqeve të blera drejt bujqësis. “Shumë toka të marra sipas ligjit 7501 kanë mbetur djerrë. Ndonëse jemi pronarë të ligjshëm shteti nuk bën asgjë jo vetëm duke mos na i kthyer, por duke mos zbatuar as ligjet në fuqi që kanë të bëjnë me lënien e tokave djerrë. Shikojmë pronat tona që ka mbirë bari kudo. Është një situatë vërtetë e trishtueshme”, shprehet një ish-pronarë.
Nisur nga kjo panoramë ata mendojnë se duke i riblerë tokat e tyre do të mund t’i kthejnë ato në toka prodhuese bujqësore, pasi pa prodhim nuk mund të bësh më asnjë hap për të nxjerrë fitime.
Strategjia e blerjes së pronave nga ana e ish- pronarëve, po ndikon edhe në planin social. Kjo skemë po eleminon disa konflikteve jo vetëm mes ish- pronarëve dhe personave që u bënë pronarë sipas ligjit 7501, por edhe mes vetë fshatarëve ku në jo pak raste janë shënuar konflikte, si për kufirin e tokës, ashtu edhe për vijat e ujit. Në plan të parë duket si një paradoks fakti që ish pronarët po blejnë pronat e tyre, por nga ana tjetër kjo duket se është e vetmja rrugë që u ka mbetur për të rimarrë pronat e tyre. /Me. Ar/
